Ministra Negósiu Estranjeiru no Kooperasaun (MNEK), Adaljiza Magno ofialmente lansa Programa Indikativu Multi-anuál Uniaun Ueropeia (EU) nian ba Timor-Leste ba tinan 2021-2027 hodi revela prioridade sira ba programa kooperasaun EU ho Timor-Leste foun.

Iha ne’e, EU sei fornese fundu ho totál EUR 55 milliaun hahú ohin loron to’o tinan 2024 atu apoia inisiativa oioin hodi dezenvolve Timor-Leste no atu promove kooperasaun ne’ebé fó benefísiu ba malu.

Iha lansamentu ne'e Embaixadór Uniaun Ueropeia (EU), Andrew Jacobs hatete, Uniaun Europea iha parseria kleur ona ho Timor-Leste, bazeia ba valór komún sira hanesan demokrasia, direitu umanu, no regra lei nian.

"Ohin loron ita marka pasu boot ida iha kooperasaun ne’e, hodi kompromete apoiu ba rekuperasaun no dezenvolvimentu ekonómiku ne’ebé di’ak ba meiu ambiente no sustentável (“Green Deal” ka ‘Kontratu Matak’ ida) nomós ba governasaun di’ak ba dezenvolvimentu sustentável. Ha’u haksolok tebes katak ami bele hakle’an ami-nia apoiu ba Timor-Leste iha ninia diversifikasaun ba ninia ekonomia, no iha ninia esforsu sira hodi hala’o integrasaun ekonómiku rejionál, inklui preparasaun ba adesaun posivel iha ASEAN”, dehan Andrew liuhusi komunikasaun imprensa ne’ebé www.tempotimor.com asesu iha kinta (03/02).

Ho dokumentu estratéjiku foun ida-ne’e, EU hatudu ninia kompromisu atu fornese apoiu ba prioridade sira-ne’ebé define iha konsultasaun ho autoridade sira Timor-Leste nian seluk, liliu Organizasaun Sosiedade Sivíl sira, inklui organizasaun feto no juventude sira, autoridade lokál sira, reprezentante sira husi setór privadu, ONU no parseiru dezenvolvimentu sira seluk iha Timor-Leste. 

Programa foun ne’e iha prioridade prinsipál rua mak Prioridade dahuluk-rekuperasaun no dezenvolvimentu ekonómiku ne’ebé di’ak ba meiu ambiente no sustentável, no prioridade daruak Governasaun di’ak ba dezenvolvimentu sustentável.

Ba faze dahuluk, husi 2021-2024, EU sei dedika kontribuisaun millaun EUR55 (maizomenis millaun USD61). Alokasaun finansiamentu ba 2025-2027 sei determina bazeia ba revizaun iha programa nia klaran iha 2024.

MNEK, Adaljiza Magno deklara enkuadramentu parseria foun nian ho Uniaun Europea sei komplementa esforsu sira Governu nian ba povu Timor-Leste nia rahun-di’ak.

“Ha’u rekoñese katak programa sira Uniaun Europea nian iha enkuadramentu parseria foun nian ho Uniaun Europea sei komplementa esforsu sira Governu nian ba povu Timor-Leste nia rahun-di’ak. Ha’u enkoraja Membru Governu sira seluk husi setór relevante sira atu foti oportunidade ida-ne’e hodi hala’o implementasaun ba Governu nia planu atu serbi ita-nia povu”, afirma nia.

Alende ne'e nomós fó parabéns ba parseiru dezenvolvimentu dahuluk iha Timor-Leste hodi kontinua implementa bazeia ba apoiu sira ne'ebé mak EU fó apoiu.

“Ha’u mós fó parabéns ba Uniaun Europea, tanba Uniaun Europea mak parseiru dezenvolvimentu dahuluk iha Timor-Leste ne’ebé apoiu Timor-Leste hodi implementa prinsípiu “Country Owned, Country Led” (nasaun rasik mak na’in no nasaun rasik mak lidera) no uza nasaun rasik nia sistema sira. Tan ne’e, ha’u kontinua hala’o diálogu polítiku tinatinan nomós diálogu polítika públiku regulár sira nu’udar instrumentu sira-ne’ebé folin boot liu hodi hametin no mantein ita-nia kooperasaun”, deklara nia.

Asaun ba Programa Indikativu Multi-anuál mak pasu importante ida hodi reforsa EU nia kooperasaun ho Timor-Leste. Sei habele EU no Timor-Leste atu kontinua serbisu hamutuk ho programa no projetu sira-ne’ebé bazeia ba objetivu, prinsípiu no valór mútua sira.

Programa ne’e mai iha altura bainhira EU hahú implementa estratéjia kooperasaun foun ida iha Indo-Pasífiku. (*)