"Ohin, ita halo inspesaun ba loja sira iha Dili laran hodi haree folin sasán nesesidade báziku sira iha loja tanba tuir informasaun katak daudaun ne’e folin sasán aumenta, maibé liuhusi inspesaun refere ita-nia ekipa la deteta loja sira balu hasa’e folin sasán tanba folin sasán nesesidade báziku ne’ebé loja na’in sira hasa’e normál hotu tanba la liu 10-15%”, dehan Inspetór Jerál AIFAESA, Ernesto Monteiro, iha loja Fortuna, Kolemera, kuarta (19/01).
Maske tuir informasaun folin sasán nesesidade báziku sira hanesan, fós, mina, terigu sira hasa’e folin maibé kategória normál tuir lei númeru 29/2011, tanba la liu pursentu 10-15.
Asistente Jerente, Loja Creative Furak, Yanty Zaka afirma, kona-ba folin sasán nesidade báziku liliu mina bimoli folin sa'e tanba impaktu husi Covid-19 ne’ebé iha nia fábrika rasik hasa’e folin.
“Ami sosa mós mai fa’an fali folin hasa’e, maibé la barak ida ami hasa’e US$0,25 de’it ba mina hán, no ba fós sira seluk hasa’e to’o US$0,50, ne’ebé ami fa’an sasán ne’e normál maibé ema mai sosa ba fa’an fali ne’e mak hasa’e folin sasán liu lei ne’ebé iha”, esplika nia.
Nune’e ba loja Fortuna rasik, sira mak hatama mina Bimoli hasa’e folin oituan tanba mina refere sa’e iha nia fábrika rasik, entaun to’o Timor-Leste fa’an hasa’e US$1 ka US$2.
Entretantu ekipa AIFAESA halo inspesaun ba loja sira iha Dili hanesan, Alfa Dili, Creative Furak, Fortuna, Perisos no seluk tan. (*)