Xefe Departementu Asaun Sosiál Munisípiu Baukau, António do Nasimento Alves hatete, iha tinan 2021 apoiu ona kaixaun 125, ne’ebé ho orsamentu rihun US$42,950 ba Postu Administrativu, Baukau Vila, Laga, Vemase, Venilale, Kelikai no Baguia, ne’ebé kompostu husi labarik ki'ik nian-4 no ba ema boot-12.

"Tinan 2022 orsamentu ne'ebé aloka mai diresaun asaun sosial ba kaixaun 61 de'it nia orsamentu rihun US$ 21.350,00 ne'e sei preukupasaun ba diresaun ida ne'e ba kaixa 61, ba tinan ne'e la sufisiente atu apoiu, kaixaun ba tinan-ida ne'e pelu menus 150 ou 200 hanesan ne'e di'ak liután," dehan António ba www.tempotimor.com, iha kna'ar fatin vila nova Baukau, kinta (20/01).

Tanba ne'e, sujere ba MSSI aloka orsamentu rihun US$50 ba Munisípiu atu halo preparasaun masimu bainhira família kbi'it la'ek sira husu tulun.

Durante iha tinan-2021 mós akontese kaixaun laiha, bainhira família kbi'it la'ek sira husu ajuda husi Servisu Asaun Sosial Munisípal.

"Kada kaixaun ida nia kustu US$350 ho nia kruz kedas ho tan transporte tula hela ba fatin distinadu sira ho gratuitu," nia hatete

Maibé, orsamentu ne'ebé aloka ona mai Munisípiu Baukau bainhira hotu, sei halo pedidu adisionál ba MSSI atu apoiu nafatin ba família kbi'it la'ek sira.

"Husi fulan-janeiru no fevreiru hanesan ne'e sira husu mais laiha, tanba prosesu tenderizasaun," nia informa

Tanba ne'e, iha fulan-janeiru tinan 2022 Diresaun Servisu Asaun Sosial hato'o ona pedidu koutasaun ba Autoridade Munisípiu hodi haruka aprovizionamentu loke tenderizasaun ba kompaña sira mak foin hahú distribui kaixaun bainhira família kbi'it la'ek sira husu.

Enkuantu, iha tinan 2021 Servisu Asaun Sosial Munisípiu Baukau apoiu transporte ba família kbi'it la'ek sira hodi tula mate isin ba postu inklui mós ba Munisípiu sira hanesan Lautein, Vikeké, Manatutu, Dili, Likisá inklui Baukau laran hamutuk 225 no mate ruin-2. (*)