Tuir informasaun ne'ebé www.tempotimor.com asesu husi pájina Gabinete Ministru Finansas, Rui Augusto Gomes katak, husi kustu ne'e sei transforma Portu Díli sai hanesan pontu Turizmu ne’ebé sei inklui fasilidade kulturál, rekreativu no rezidensiál.
Tanba projetu ne’e sei kria empregu no fornese oportunidade komersiál ba rezidente sira iha Díli, halo kapitál Timor-Leste sai furak liután hodi bele atrai turista doméstiku no turista internasionál iha futuru.
Projetu re-dezenvolvimentu no Komersializasaun Portu Díli ne’e hetan ona aprovasaun husi Konsellu Ministrus iha 28 jullu 2021. Nune'e iha loron 8 fulan-setembru 2021, Konsellu Ministru análiza filafali planu dezenvolvimentu ba reestruturasaun no modernizasaun Portu Díli, ne’ebé hetan ona deliberasaun iha Sorumutuk Konsellu Ministrus iha loron 28 fulan-jullu tinan 2021.
Maibé, iha alterasaun balun iha faze redasaun finál, presiza submete filafali ba deliberasaun foun.
Konsellu Ministru manifesta ona ninia preferénsia hodi adopta modalidade finansiamentu Parseria Públiku-Privada (PPP) atu dezenvolve tuir kuadru legál no regulamentu iha vigór.
Planu dezenvolvimentu ba reestruturasaun no modernizasaun Portu Díli prevé katak hafoin transferénsia funsaun husi portu karga ba portu foun Tibar, sei halo ninia konversaun ba mariña no portu kruzeiru sira.
Tanba ne’e, projetu nasionál importante, lokalizadu iha área estratéjika sentrál no importante iha sidade Díli, ninia funsaun iha ligasaun marítima ba populasaun sira husi Oekussi no Ataúru, no potensiál atu sai polu dinamizadór turizmu marítima iha Timor-Leste.
Projetu re-dezenvolvimentu no komersializasaun Portu Díli sei administra husi Autoridade Portuária Timor-Leste (APORTIL) ne’ebé tutela iha Ministériu Transporte no Komunikasaun ho asisténsia tékniku husi USAID's Tourism For All Project. (*)