"Hanesan ita-boot sira balun rona ona katak bainhira Portu Tibar ne'e hotu karga sira tula kontentór sira ne'e muda hotu ba Portu Tibar nian nune'e Portu Dili sei uza hanesan fatin turizmu tanba Portu Dili iha nia potensiál rasik sai polu Dinamizador Turizmu iha Timor-Leste" informa MPKM Fidelis Leite iha Ministeriu Finansas Aitarak Laran Kuarta (08/09)

Tanba Prosesu Konstrusaun Portu Tibar ne'ebé mak besik termina ona nune'e Governu iha planu atu halo análize filafali ba planu dezenvolvimentu ba reestruturasaun no modernizasaun Portu Dili nian, ne’ebé hetan ona deliberasaun iha Konsellu Ministrus iha loron 28 fulan-jullu tinan 2021, maibé, reajenda filafali iha reuniaun Konsellu Ministru 08 fulan-setembru atu nune'e iha faze redasaun finál seguru no legál liu.

Planu dezenvolvimentu ba reestruturasaun no modernizasaun Portu Dili nian, prevé katak hafoin transferénsia funsaun sira husi portu karga ba portu foun Tibar, sei halo ninia konversaun ba marina no portu kruzeiru sira.

Tanba ne'e, Portu Dili ne'e mós sei kontinua hala'o nia funsaun atu lori pasajeiru sira husi Dili ba Ataúro no husi Dili ba Oekussi.

"Ho hanoin ida ne'e Portu Dili sai nafatin fatin ida ba ita-nia komunidade sira atu ba Ataúro ba Oekussi, ita mós dezenvolve hela Portu rejionál sira iha programa diskusaun ba dezenvolvimentu Portu Dili nian no Ró sira iha ne'eba bele lori turista sira atu haree rikezas Timor nian sira bele sai husi Portu ida ne'e", afirma nia.

Ho ida ne'e, projetu importánsia nasionál, haree ba ninia lokalizasaun iha área estratéjika sentrál ida no importante iha sidade Dili, ninia funsaun iha ligasaun marítima ba populasaun sira husi Oekussi-Ambenu no husi Ataúro. (*)