"Loron konsulta popular ne'e, loron ida ne'ebé mak ema hothtou hola parta iha konsulta ida ne'ebé mak, ema bolu konsulta popular tanba momentu ne'e iha opsaun rua mak mosu, opsaun ida hili integrasaun, e opsaun ida hili ba independénsia", dehan SEKoop, Elizário Ferreira, iha Sede Suku Fahilebo, Postu Administrativu Bazartete, Munisipiu Likisá, segunda (30/08).

Husi opsaun ida Independénsia ne'e mak, hamosu konsulta ida liuhusi eleisaun, ne'ebé mak hala'o iha loron fulan 30 de Agostu tinan 1999, hanesan ho loron ne'ebé selebara ona dala-22 povu deside nia votu liuhusi surat tahan ho pregu hodi hetan vitória ba Ukun rasik-an.

"Ida ne'e mak bolu naran konsulta popular, ne'ebé mak povu tomak deside dstinu Timor nian ba ukun rasik-an. Ohin loron povu tomak tenke serbisu hamutuk nafatin hodi asegura independénsia e asegura sustentábilidade ekonómiku rai ida ne'e nian ba instituisaun hotu, ba família, sosiedade hotu atu nune'e bele asegura independénsia ida ba ema hothotu", nia afirma.

Halo mós apelu ba dirijente no membru kooperativa sira hotu iha Timor-Leste, atu nafatin kaer metin espíritu independénsia nian hodi dezenvolve planu ida ne'ebé tuir prinsípiu kooperativa nian atu kontribui ba redusaun kiak no fó solusaun ekonómiku, sosiál iha sosiedade tomak.

"Primeiru atu fó parabéns ba povu Timor-Leste, ne'ebé mak tinan 22 ba kotuk, oras ne'e sei iha hela sentru votasaun sira, balu ne'ebé vota ona fila ba fatin, e hakat liu ba foho", hatete Elizário.

Xefe Suku Fahilebo, Marcelino da Cruz hatete, loron konsulta populár sai nu'udár loron ida importante ba povu Timor-Leste tomak, tanba deside ona votu hodi determina nasaun ida hamrik mesak no la sadere ba ema seluk.

Maibé, nia husu ba estadu no Governu TL, atu selebra loron istóriku ne'e, labele de'it iha munisípiu, maibé tenke tun to'o iha baze.

"Hanesan líder komunitáriu rekomenda ba ita-nia estadu, liliu ba oitavo Governu, atubele haree mós kona-ba Konsulta Polular 30 de Agostu nian, labele komemora de'it iha munisípiu sira, maibé bele to'o iha baze, hanesan suku sira, atu nune'e ita-nia komunidade sira mós bele sente dehan katak, konsulta popular iha 1999 mak fila hikas ona mai ne'e. Atu nune'e ita-nia komunidade sira mós bele sente dehan katak ukun-an mai husi 30 de Agostu. Ne'ebé loron ida 30 de Agostu ne'e, loron ida espesiál ba Timor-Leste tomak", afirma nia. (*)