Durante serimónia ne'e, SEKoop, Elizário Ferreira husu ba dirijente no membru sira atu labele hamate fali kooperativa ne'e, tanba lori naran Komandante Falintil, Saudozu Nicolau Lobato nian, ne'ebé hari'i mós kooperativa komunál ida iha duni Suku Fahilebo.
"Ikus liu, keta haluha, lori naran Santu ne'e, naran ida patriótiku ne'e, labele halo kooperativa ne'e mate. Kuandu imi halo mate, nia mak babeur imi. Tenke halo nia moris ba bebeik, para dada ema hotu mai iha ne'e. Aban bainrua ema hotu mai vizita fatin ne'e, sai fatin turízmu ba ema hothotu. Hatudu katak, uluk Prezidente Nicolau Lobato hari'i kooperativa, fatin mai ne'e", hatete Elizário Ferreira, iha Sede Suku Fahilebo, segunda (20/08).
Tanba Suku Fahilebo mak baze ida atubele hari'i kooperativa no oras ne'e mós moris ona kooperativa ida ho espíritu saudozu Prezidente Nicolau Lobato nian.
"Ho kooperativa ida ne'e bele mós kontribui ba liberta kiak ne'ebé iha suku ne'e nomós suku sira seluk. Ida ne'e mak esénsia husi kooperativa ne'e, e ha'u-nia prezensa iha ne'e atu asiste sira-nia pose no juramentu, e fó mós mensajen oinsá mak atu dezenvolve kooperativa kréditu tuir prinsípiu kooperativa kréditu ninian", dehan nia.
Tanba ne'e, sujere ba membru sira atu deside toos fatin komunal uluk ne'ebé Komandante Nicolau Lobato halo, atu transforma sai hanesan fatin turízmu.
"Sé bele, imi nia sede ba tau duni iha fatin ne'ebá, para aban bainrua ema mai vizita, dehan la/e, fatin ida ne'e mak nia hari'i kooperativa iha ne'e, e ami hari'i filafali, e fatin ida ne'e sai fali toos ba kooperativa sira", afirma nia.
Prezidente Kooperativa, Marcelino da Cruz hatete, lala'ok hari'i kooperativa CCRNL ne'e, mai husi Asosiasaun Naroman, ne'ebé hari'i iha loron 29 fulan-marsu 2011. Asosiasaun Naroman mós habarak ona fini komersial Timor-Leste nian iha Suku Fahilebo.
Maibé ikus mai asosiasaun refere, hari'i tan fali grupu ida ho naran USP, ho atividade rai osan no empresta osan, iha loron 17 fulan-Maiu 2013, ho totál membru hamutuk ema na'in-22, kompostu husi feto 10, no mane na'in-12, ho sira-nia valór osan hamutuk US$198.
Hahú husi tinan 2013, mai to'o 2021, grupu ida ne'e ho totál membru 134, kompostu husi feto 67 no mane 67, ho valór osan hamutuk UU$51,412.
"Ohin loron, segunda, 30 de Agostu 2021, grupu USP, nakfilak aan ba Cooperativa de Credito Roman Nicolau Lobato (CCRNL)", dehan Marcelino.
Razaun hamosu kooperativa kréditu roman Nicolau Lobato, tanba iha 1974 saudozu Nicolau Lobato, halo hela toos komunal agrikultura produsaun ai-hán iha Suku fahilebo.
"Ikus liu mak, ohin loron segunda, 30 fulan-Agostu 2021, USP, sarani ba naran Cooperativa de Credito Roman Nicolau Lobato (CCRNL). Too ba de'it ami-nia relatóriu badak", afirma nia.
Administradór Postu Administrativu Bazartete, João Braz hatutan, kooperativa ne'ebé mak Saudozu Nicolau dos Reis Lobato ho Vicente Reis "Sahe", hari'i iha tempu rezisténsia, nia rezultadu mak oras ne'e dadaun ema hotu sente hela, mak ukun-an.
Enkuantu, rezultadu husi dirijente no membru sira iha kooperativa CCRNL sei naruk, sei la hotu, tanba jersaun sira tuir mai sei kontinua tuir mehi ne'ebé mak halo dadauk.
"Uluk, ita-boot sira hahú ho asosiasaun. Asosiasaun ida ne'e, ema rona mais, ema la koñese, asosiasaun ne'e iha oituan ne'ebé. Ita-boot sira la'o mesmesak loos, buka malu, ema mak laiha atu foti osan. Ho kooperativa, ita-boot sira-nia liras sei naruk tan, sei tutan ba tan, ema hothotu ne'ebé interese, sira sei hakarak sai membru, e ita-boot sira-nia kooperativa kréditu naroman Nicolau Lobato, sei naroman ba bebeik, sei la nakukun", dehan nia. (*)
