“Em primeiru lugar hakarak atu hodi señor Ministru Turízmu Komérsiu no Indústria nia naran, hanesan mós Prezidente Autoridade, hakarak atu hato'o ami-nia apresiasaun boot tebes ba setór privadu hirak ne'ebé mak halo ona investimentu iha Timor-Leste, ligadu ho setór importante haat, ne'ebé mak Timor-Leste sei lori ba Dubai. Ida mak setór Turízmu no Ospitálidade, ida seluk mak Agrikultura no Peska, ba Konetividade, Transporte no Lojístika ninian, e ba Petróleu no Minerais”, informa Prezidente Autoridade Expo Dubai, Manuel Vong, hafoin halo konsultasaun ho setór privádu sira ba Expo Dubai, iha Salaun City 8, Canossa Has-laran, Manleuana, Dili, tersa (17/08).
Governu liuhusi Ministéiu Negósiu Estranjeirus no Kooperasaun (MNEK) mós hakarak promove diplomásia ekonómia atubele liga entre setór haat ne'ebé mak mensiona ona.
“Nune'e mós ministru nia orientasaun, katak setór privádu sira, em nome do governu, hakarak atu enkoraja sira no sira-nia partisipasaun iha expo ne'e sai hanesan oportunidade ida ba sira atu halo sira-nia negósiu. Entaun, Governu kria kondisaun, fasilita setór privádu sira atubele partisipa iha forum iha internasionál ida ne’e, liliu iha Business to Business (BtoB), iha Timor-Leste weekend Business, forun nomós iha Government to Government ne'ebé mak entre governante sira sei halo”, dehan nia.
Preprasaun ba Expo Dubai, fahe ba faze tolu, ida mak pre expo husi loron 01 fulan-Outubru to'o loron 30 fulan-Setembru 2021, atinje ona pursentu 99 (99%), tanba haree kondisaun lojístika, rekursu umanu no pesoál sira ne'ebé atu ba serbisu iha pavilaun Timor-Leste nian iha Expo Dubai, téknikamente sira preparadu hotu ona.
“Segundu, kona-ba preperasaun sira ne'ebé mak pakote ka iha investimentu nian, mak agora dadauk ita halo, ha’u bele dehan mós katak, preparativus sira ne'e, atinje ona 70 pursentu (70%), no ida seluk mak periodu expo nian komesa iha dia 01 de Outubru, sei termina iha dia 31 de Marsu 2022”, esplika nia.
Prezidente Cámara Comérçio e Indústria Timor-Leste (CC-ITL), Oscar Lima konsidera, partisipasaun Timor-Leste nian iha Expo Dubai, importante atu ema bele koñese imajen TL nian iha mundu, tanba foin ukun-aan iha tinan 19 nia laran.
"Ha'u-nia hanoin, importante liu ita partisipa iha Expo Dubai, ne'e para ita fa’an ita-nia imajen, ne'e núneru um. Imajen Timor-Leste ema ida nunka koñese, seidauk koñese, rai ida foin mak ukun rasik-an, e ita hanesan rai ki'ik, ne'e Governu atu hakarak ka lakohi, tenke investe atu fa’an ita-nia imajen, ne'e primeiru”, hatete Oscar Lima.
Ministru Koordenadór Asuntu Ekonómiku (MKAE), Joaquim Amaral esplika, vantajen Timor-Leste partisipa iha Expo Dubai atu lori investidór timoroan sira bele fahe esperiénsia ho nasaun sira iha mundu, nomós nu'udár pasu ida atubele integra-an iha komérsiu globál.
“Konserteza ita atu partisipa iha eventu ida, ita mós tenke iha planu katak, sá vontajen mak ita hakarak hetan husi ne'ebá. Tanba hanesan nasaun ki'ik, ita presiza pozisiona, branding, koloka ita-nia an iha merkadu globál. Tanba ita rai kiik, ita-nia ekonómia ne'e mós tenke integra ba komersiu globál. Ho integra ba komérsiu globál mak bele ajuda investór sira koñese, e sente seguru halo investimentu”, nia dehan. (*)
