"MTCI agora purvolta 40 ona, maka ezekusaun totál ba 2022 nian e restante sei halo hotu másimu to'o marsu 2023", dehan MTCI, José Lucas Do Carmo Da Silva iha Palasiu Governu, kuarta (21/12).

Husi total ezekusaun pursentu 40 ne'e, tranfere ba kompaña implementadór hamutuk 12 ne'ebe hetan kontratu husi MTCI.

Maske, implementasaun ba programa Cesta Bázika durante mosu lamentasaun barak husi komunidade sira, maibé MTCI sempe fo orientasaun ba kompaña sira atu rezolve.

"Purzemplu iha lamentasaun sira-ne'ebe mai, ami sempre orienta atu ko’alia no klarifika ba públiku mak ne'e, iha prosesu tomak Cesta Bázika ne'e iha fatin lubuk ida iha ne'ebá e últimu desizaun molok atu fahe, iha mos konsensu entre ekipa ne'ebe integradu iha ne'ebá", nia afirma.

Tanba, ekipa konjunta iha ne'eba, envolve husi funsionáriu Ministériu, AIFAESA, KAK, PDHJ nomos autoridade lokal sira, antes halo distribuisaun ai-hán no produtu lokal sira ba benifisiáriu, sempre iha konsensu, nune'e karik iha lamentasaun ruma sira tenke rezolve kedas.

Aleinde ne’e, Ministeriu Turismu, Komersiu no Indústria mos orienta ona kompaña sira atu tau dasi iha fatin distribuisaun hotu, atu benifisiáriu sira bele tetu bainhira simu Cesta Bázika.

Nune'e, meiu ne'e nu’udar melloramentu ne'ebe governu tenke halo atu halo fornesimentu hahan ba povu, ne'e duni atu asegura buat hirak-ne'e, parte Ministru orienta ona atu kumpre.

"Maibé, lamentasaun sira ne'ebe maluk sira foti ba to'o tiha uma mak lamentasoens ne'e buat seluk ida, Ministeriu, Sekretaria Estadu, Ajensia sira responsabiliza ba, bainhira sira simu hotu iha fatin ne'e iha lamentasoens, tenke rezolve kedas iha ne'eba, tenke tetu, la to'o, halo to'o, satán sasan ladi'ak, ne'e imediata tenke troka kedas, ne'e orientasaun eh tuir dekretu lei", nia hatete. (*)