Nia dehan, iha tinan 2018, MAP ho Patrimoniu Estadu halo identifikasaun ba trator hirak ne’ebé nia kondisaun fraku ona no leilaun ona trator 56. Husi númeru ne’e ema foin hola tratór rua.
"Iha tinan balun liu ba mak Xina apoiu trator neen, depois iha governu sira liu ba hola trator foun. Nune'e tratór foun sira ne'ebé iha ne'e entre 14-18 mak sei foun, maibé restu ne'e kondisaun fraku ona," dehan Ministru ne’e iha palásiu governu hafoin partisipa reuniaun Konsellu Ministru, Kuarta (10/07).
Trator hirak ne’ebé atu leilaun, Ministru ne’e dehan, maioria hatama mai Timor Leste iha tinan 2008.
“Ne'ebé presiza tempu mak ema hola. Tanba trator barak mak kondisaun fraku ona,” informa Ministru Joaquim.
Leilaun ne’e, nia dehan, bazeia ba orientasaun husi Primeiru Ministru Taur Matan Ruak. Tan ne’e MAP sei kontinua esforsu atu asegura orientasaun refere.
"Asegura nafatin PM nia orientasaun no ami haree hela oinsa atu halo leilaun ne'e mós fazeadamente par labele fó impaktu ba trator sira," dehan Joaquim.
Kona-ba presu, Ministru ne’e dehan, MAP laiha koñesimentu ba presu tanba presu ne’e deside husi Patrimoniu Estadu ne’ebé toma konta ba leilaun.
Iha tinan hirak ba kotuk Governu Timor Leste hasai osan bo'ot hodi sosa Trator foun ho objetivu atu hasa'e produsaun agrikula liu-liu hare maibe iha realidade invazaun fo'os nafatin mai husi Vietnam ho Thailand nune'e hetan kritikas barak kona ba uzu tratores sira ne'e.
"Ha'u la hatene governu sira ne'e ninia hakarak. Mas ita hatene Governu gosta gasta osan bo'ot sosa trator maibe so aumenta gastus ba orsamentu estadu. Tan ba tinan tinan sira husu osan opera, sosa mina no oliu e halo manutensaun maibe ninia produktividade la iha," dehan estudante universitariu, J. da Costa ximenes ba Tempotimor.com (10/07).
Nia haktuir, "Governu so gosta gasta osan mas la iha planu oin sa hasa'e produsaun."