Diretóra Jerál MAP, Maria Odete do Céu Guterres, hatete, tinan barak natar pertense ba irrigasaun sobabere kuaze abandona, tanba difikulta husi irrigasaun, maibé iha tinan-2022 polítika Governu liuhusi MAP konsege normaliza hodi fornese bee ba natar ba segundu époka nian.

"Kolleta hare iha irrigasaun sobabere área poténsialidade 520, maibé ohin ita kolleta ba 240 hektares ba segundu époka nian, área ida ne'e tinan hirak ita la utiliza, tanba problema irrigasaun, maibé normaliza tiha irrigasaun, bee tama ba natar ohin loron ita kolleta",  dehan nia hafoin kolleta hare iha Suku Seiçal, Kinta (29/12).

Husi kolleta hare objetivu atu fó hanoin ba natar na'in sira atu badinas halo natar hodi reduz fós importadu, tanba populasaun Timor-Leste hamutuk 1.3 milloes, konsumu fós toñelada 130 mil, iha tinan-2022 atinji fós 85 mil toñelada, nune'e prezisa tán fós toñelada 60 mil.

Alende ne’e, Governu mós fó ona importánsia ba produtu fós lokál liuhusi programa Cesta Bázika, maibé produsaun la to'o.

"Sé ita esforsu kontribuisaun diak husi belun agrikultór sira, tinan-tinan Governu halo nia estratéjia hasa'e produsaun, fó fini, fila rai, buat sira ne'e hotu, mais presiza mós seiriedade kuda barak liután", nia hatete

Reprezentante Prezidente Autoridade Munisípiu Baukau, Agostinho Euzebio Guterres, loúva natar na'in sira husi irrigasaun sobabere,  tanba iha intensaun di’ak hasa'e númeru produsaun iha rai laran liuhusi époka daruak.

"Tuir informasaun ne'ebé iha, segundu époka aplika ba irrigasaun sobabere, bulutu no larisula, so que ita iha ne'e la'o, tanba apoiu husi ita nia Autoridade lokál sira, liuliu agrikultura sira", nia dehan

Husu MAP atu nafatin apoiu agrikultór sira iha Sobabere hodi apoiu produsaun iha rai laran, tanba irrigasaun refere wainhira iha tempu udan sempre kotu.

"Liuliu primeira époka ne'e problema, tanba udan mota tun sobu, entaun enome autoridade husu MAP apoiu eksa permanente iha ne'e ita nia agrikultór sira halo natar la'o di'ak kuandu udan", nia hatete

Enkuantu Xefe Grupu Mandiri, Nazário Maria Tavarez, akresenta, ba segudu époka nian parte natar sira husi irrigasaun sobabere hatudu rezultadu produsaun di'ak, maibé difikulta iha irigasaun.

"Irrigasaun ne'e mak difikulta, ami halo natar ba segundu époka nian kotu dala tolu, ne'ebé agora ami husu mak ne'e, Governu Hadi'a bee dalan atu bee tama natar ami servisu, tanba ami iha ne'e badinas, maibé irrigasaun mak ladi'ak", nia afirma.

Entretantu natar hektar 240 ne'ebé MAP kolleta pretense ba agrikultór hamutuk na'in-480. (*)