Diretóra jerál MAP, Maria Odete do Céu Guterres, rekoñese, joven barak iha Timor-Leste ladun partisipa iha servisu agrikultura nian, hanesan halo natar kompara ho ferik katuas sira, maibé ativu fali iha área ortikultura, tanba kompara rezultadu ortikultura ho agrikultura parte agrikultura la hetan osan hanesan iha área ortikultura nian.
Nune'e, MAP esforsu ona, sei hakbesik aan ba grupu joven sira atu motiva ativu mós iha parte agrikultura nian.
"Ita mós sei halo polítika ida, envolve ita nia grupu joven sira, motiva sira atu fiar aan katak fatin agrikultura mós halo osan", dehan nia hafoin kolleta hare iha Seiçal, Postu Administrativu Baukau Vila, Munisípiu Baukau, Kinta (29/12).
Tanba, iha tinan-2022, MAP liuhusi ékipa, halo ona estudu viabilidade ba irrigasaun boot hamutuk 27 iha teritóriu nasionál atu ativa hikas natar sira ne’ebé abandona kleur ona.
"Tinan-2022 iha 27 kanais irrigasaun mak tama ona lista estudu, termasuk sobabere ne'e hotu, ita espera tinan oin rezultadu iha, ita aprezenta ba justifika, tanba la'os fasil, ita tenke ulun malirin tuur deskuti prioridade ne'e, ba ida ne'e, hanesan ne'e ita bele manan ita nia justifikasaun estratéjika bele hetan osan hadi'a ida ne'e", informa nia
Wainhira Governu konstrui duni irrigasaun sira serteja ho orsamentu boot, nune'e MAP sei uza nia polítika liuhusi programa hakbesik aan ba natar na'in sira liuliu joven sira oinsá reativa fali natar sira ne'ebé abandona tinan barak ona.
Entretantu tinan-2023, MAP préve orsamentu ho montante US$29 millões, tuir planu sei responde ba área floresta, pekúaria, peskas inklui agrikultura. (*)
