Tuir diretór jeral SEFOPE Paul Alves katak, planu atu halo akordu ho BNCTL hodi assegura osan traballadór timor iha rai liur hanesan iha Australia no Koreia do Sul ne’e hahú planu iha sestu governu konsituisional.
“Iha tempu naruk nia laran ami nia diresaun, tekniku sira estuda kle’an teb-tebes desde sestu governu konstitional. Depois ita kontinua fali iha oitavu governu konstituisional, ne’ebé konsege realiza asina akordu SEFOPE ho BNCTL hodi fasilitas kreditu ba traballadór timoroan ne’ebé hakarak ba servisu iha Australia ho Korrea do Sul. Nomós bele ajuda ita nia traballadór sira hodi transfere osan fila fali mai tama rasik ita nia banco BNCTL ne’ebé mak ita iha ona”, tenik Paul Alves bainhira reprezenta Sekretáriu Estadu SEFOPE hodi asina MoU ho BNCTL iha Kaicoli, sesta (12/07/2019).
Nia dehan bainhira osan traballadór sira nia transfere ona mai iha BNCTL. Traballadór sira iha direitu ba pursentu sanolu resin lima (15%) iha ema nia rai.
“Traballadór sira iha rai liur bainhira sira fila fali mai, sira sei sinte katak sira nia osan mohu iha ema nia rai. entaun ami halo politika ida no ami sei halo deklarasaun ho traballadór katak sira ba iha ne’ebé sira sei simu osan pursentu 15%. maibé 85% traballadór sira simu iha timor.
Tuir nia katak, dalabarak timor ona sira ne’ebé ba servisu iha rai liur fila mai osan laiha, tanba gasta hotu iha ema nia rai. Entaun polítika ida ne’e atu asegura traballadór sira nia osan para labele hotu iha ema nia rai.
“tanba fatór balun hatudu katak traballadór sira mai Timor osan laiha, tanba sira gasta hotu. Tanba ne’e ita halo polítika ida ne’e, hodi assegura orsamentu ne’ebé traballadór sira hetan liu-liu iha Korrea do Sul no Australia," nia hatutan.
Parte SEFOPE mós sei halo enkontru ho família traballadór sira atu nune’e família sira mós bele asesu ba orsamentu husi traballadór sira no pursentu hira mak bele asesu husi osan kapital pursentu ualunolu resin lima ne’e.
Entretanto Prezidente Koncelho Administração BNCTL Brigido de Sousa katak, objetivu husi asina akordu ne’e atu ajuda traballadór sira bele rai osan ba futuru.
“Asina akordu ne’e parte ida ne’ebé BNCTL ho SEFOPE atu serbisu hamutuk entermus de destinasaun informasaun kona-ba traballadór sira simu sira nia saláriu nomós Sira bele Rai Osan”, dehan Sousa.
Nia salient, kooperasaun ne’e la’os de’it ba traballadór sira ne’ebé servisu iha Australia no Korrea do Sula, maibé ba mós traballadór sira ne’ebé hala’o servius iha rai liur.
“Oportunidade la’os de’it traballadór sira ne’ebé servisu iha Koreia no Australia maibé ba traballadór sira servisu iha rai liur hotu ne’ebé fasilita husi SEFOPE”, dehan Brigido.
Nia mós dehan servisu hamutuk ne’e, la’os para atu rai osan iha banku de’ir, miabé importante mak traballadór sira ne’ebé servisu iha rai liur, bainhira simu sira-nia saláriu labele gasta de’it, "maibé sira mós rai osan ba sira nia futuru".
“Bainhira osan traballadór sira nian haruka hotu ona mai iha banku kada fulan, depois sira nia kontratu to’o ona para sira fila mia iha Timor mak sira hakarak halo negósiu ruma ka buat seluk sira iha ona osan ne’ebé sufisiente hosi halo negósiu”, tenik nia