Timor-oan 900 Resin Hatama Aplikasaun ba Programa PLS Featured

Timor oan ne'ebe tuir hela izame hodi konkore ba programa Pacific Labor Scheme, iha Tower Fatuhada Dili Timor oan ne'ebe tuir hela izame hodi konkore ba programa Pacific Labor Scheme, iha Tower Fatuhada Dili Foto Suplai

Tempotimor (Dili) Programa Pacific Labour Scheme (PLS) ne’ebé VIII Governu Loke liu husi Sekretariu Estadu Formasaun Profesional (SEFOPE) hetan resposta pozitivu husi Timor-oan sira. Ida ne’e bele haree husi númeru aplikante ne’ebé hakarak atu kompete atu ba serbisu iha Australia.

Tuir informasaun husi SEFOPE, Timor-oan na’in 900 resin mak hatama sira-nia karta aplikasaun ba programa PLS.

Programa PLS nu’udar programa ne’ebé SEFOPE liu husi serbisu hamutuk ho governu Australia loke ba Timor-ona sira atu bele ba serbisu iha Australia

“Ami halo ona screening durante loron tomak ba sira-nia formulariu aplikasaun ne’ebé sira manda mai ita, kuaze 900 resin ona,” informa Koordenadór Programa PLS, SEFOPE, Paulo de Oliveira Rodriques foin lalais, iha Tower Fatuhada. 

“Kandidatu sira ne’e di’ak, ita haree sira-nia karta aplikasaun ne’e meet the criteria. Sira-nia Inglês di’ak no iha mós esperiensia serbisu”. 

Hafoin simu karta aplikasaun, iha 4 Jullu ekipa husi SEFOPE halo intervista ba kandidatu sira. 

“Intervista ne’e nu’udar selesaun dahuluk atu buka hatene kandidatu ne’ebé di’ak hodi bele oferese ba kompañia iha loron 8 Jullu tinan ida ne’e molok kompañia mai halo teste direita,” informa Paulo.

Iha fatin hanesan, kandidatu ida ba programa PLS, Andre da Costa (28) hatete, razaun nia hakarak tuir programa ida ne’e tanba iha Timor Leste seidauk iha kampu serbisu, no nia mós hakarak ba buka tan esperensia foun iha Australia. 

“Ami hakarak kontribui ba ita-nia nasaun hodi hamenus dezempregu,” hatete Andre. 

Molok ne’e, André nu’udar trabaladór ida iha Otel no kompaña balun iha Dili, no iha ona esperensia balun. Maske nune’e, nia hakarak atu koko sorte iha programa PLS hodi bele aumenta tan ninia esperensia.

Kandidatu seluk, Mateus Purificação (30) dehan, nia koko programa PLS ho intensaun atu bele hetan serbisu hodi aumenta rendimentu no buka esperensia foun. 

Ba kandidatu seluk, Quintão Martins Araújo Tilman (41), programa PLS ne’e pozitivu tan ne’e husu ba governu Timor Leste no Australia atu kontinua loke programa ne’ebé hanesan nune’e bele fó oportunidade ba Timor-oan barak liu tan ba serbisu iha Australia. 

Quintão dehan, nia prontu atu hala’o serbisu saida de’it bainhira hetan oportunidade.

Daudauk ne’e, Quintão serbisu nu’udar pesoal seguransa iha ONG balun iha Dili. 

Pacific Labor scheme programa ne’ebe fo oportunidade serbisu kleur uitoan ba ema sira husi nasaun illa pasifik ninian no Timor Leste ho Australia foin selebra akordu kona ba partisipasaun Timor Leste iha programa ne’e iha loron 29 fulan Marsu Tinan 2019.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.