Prezidente Kooperativa Lanamona husi munisípiu Maliana, Domingas dos Santos hateten, atividade ne'ebé membru sira halo iha Kooperativa ne’e maka halo transaksaun ba osan hanesan faan osan oan ne'ebé koñesidu ho atividade kréditu, fó formasaun ba membru sira ne'ebé maka balun ladun ativu selu osan, parte estrutura ajuda buka solusaun.

Nia dehan, durante ne'e, kooperativa Lanamona mós servisu hamutuk ho ekipa voluntáriu sira ne'ebé oferese husi Corpo da Paz, hodi fó treinamentu ba agrikultór sira atu bele halo produsaun ne'ebé kualidade no kuantidade nune'e sira bele hetan osan, bele rai osan nomós bele selu ba kréditu.

“Ami bele hateten iha situasaun pandemia, ami fahe oráriu, ami nia office ema ida-rua mak hein, maibé staff hotu-hotu ida-idak ba vizita nafatin membru sira iha sentru-sentru sira”, Domingas hateten ba jornalista iha edifísiu Fundasaun Hanai Malu (FHM) Lanud-Bairru Pite, Kuarta (09/12).

Nia hatutan, membru hirak ne'ebé sira konsidera moris vulnerável liu iha tempu Covid-19 ne'e sira fó apoiu hanesan lori fós, pakote ijiéniku hodi fahe ba iha membru sira, atu membru sira mantein no bele fiar nafatin katak sira nia ezisténsia nafatin iha relasaun ba malu.

“Ami la hasoru dezafiu ida ne'ebé boot, ami iha posibilidades bele ba vizita fali sira depois liu tiha fulan maiu, agora ami fila-fali estável”, nia dehan.

Maske nune'e, durante pandemia surtu covid-19, difikuldade ne'ebé sira hasoru iha kooperativa maka, membru barak mak la hatama osan funan, tanba sira labele halo atividades ekonómika.

“Ami iha orsamentu iha fin de Outubru ami iha ona rihun $133.400, ho totál membru iha ona 1.723, no Maliana rasik iha ona sentru kooperativa hamutuk 29”, nia informa.

Kooperativa Lanamona, komesa nakloke aan ona ba munisípiu lima hanesan, Maliana, Likísa, Aileu, Ermera no Dili ho nia sentru sira hamutuk 39 ne'ebé lokaliza iha postu administrativu 9 ho suku hamutuk 27.

“Agora daudaun ami iha hela konstrusaun uma sentru iha Dili ne’e ba andar tolu, sé la obstakulu iha fulan Abril, ami halo ona inaugurasaun ba sentru Díli ninian”, nia hateten.

Entretantu, Kooperativa Kréditu Lanamona harii iha tinan 2004, ho membru hamutuk ema nain 13, ne'ebé sira tau naran grupu “Fó Liaman” ho nia kapitál iha de'it $300.

Hafoin grupu ne'e la'o to'o iha tinan 2008, husi kapitál finanseira $300 ne'e sa'e ba rihun $7, ikus mai sira deside realiza assembleia extraordinária ida hodi muda naran ba kooperativa Lakon Nakukun, Mosu Naroman (Lanamona), neebé eziste to'o ohin loron kompleta ona tinan 16.(*)