Selebrasaun ne'e realiza ho tema, “Polítika no estratéjia rehabilitasaun kooperativa primária no sekundária iha Timor-Leste”, no halo “Avaliasaun no reajustamentu kooperativa primária no sekundária iha post pandemia Covid-19” ho oradór úniku maka Sekretáriu Estadu Kooperativa (SEKoop), Elizário Ferreira.

Elizário esplika, Federasaun Hanai Malu (FHM) realiza eventu rutina ne'e sira sempre hala'o hodi halo avaliasaun ba progresu no dezafiu kooperativa nian, tanba ne’e ho nia prezensa atu fasilita informasaun kona-ba dezenvolvimentu integradu baze iha kooperativa ba iha dirijente sira.

“Tanba ida ne'e maka semináriu ne'e hala’o ho oradór úniku ha’u maka ko’alia, depois sira sei kontinua ho sira nia elaborasaun planu no aban komemora loron kooperativa kréditu nian. Tanba ida ne'e mai ko’alia iha ne’e atu asegura katak, servisu ne’e bele funsiona ho didi'ak hodi bele implementa ne'ebé maka SEKoop nian ba benefísiu ema hotu nian”, Elizário Ferreira hateten iha Salaun Fundasaun Hanai Malu (FHM) iha Lanud-Bairru Pite, Kuarta (09/12).

Nia dehan, dirijente kooperativa sira presiza liu maka formasaun atu fasilita hadi’a kualidade rekursu umanu ba kooperativa sira hotu atu bele no prontu hodi implementa kapitál finanseira ne'ebé governu liuhusi SEKoop sei investe.

Formasaun espesífiku maka sira hanaran, formasaun ne'ebé bazeia ba terrefa traballu nian, tanba kooperativa, iha nia estrutura haat, kompostu husi konsellu diretiva, no iha konsellu diretiva nia laran kompostu husi ema nain-lima, ida membru, ida tezoureiru maka presiza hetan formasaun kona-ba oinsá atu jere kapital finanseira.

“Sekretária sei hetan formasaun oinsá atu jere administrasaun sekretáriadu nian no prezidente sei hetan formasaun kona-ba oinsá atu lidera kooperativa ida hodi fó benefísiu ba kooperativa, asegura sustentabilidade, estrabilidade finanseira no ekonómiku kooperativa nian”, nia dehan.

Nia hatutan, ba konsellu fiskál, hetan formasaun oinsá atu hala'o fiskalizasaun ida di'ak ba servisu kooperativu liu-liu iha ezekutivu sira, no parte ezekutivu sira sei hetan formasaun bazeia ba iha nivel koñesimentu kooperativa nian, oinsá atu jere kooperativa sira tuir estandarizasaun akontabilidade kooperativa nian rasik.

Komíte kréditu sira, sei hetan formasaun oinsá atu fasilita formasaun ida ne'ebé viável no bele iha devolvimentu ne'ebé di'ak, husi komíte edukasaun, normalmente hetan nafatin formasaun ba matéria hotu-hotu atu bele fasilita formasaun ba membru sira kada loron no bebeik atu nunee membru sira edukadu.

“Tanba buat ida prinsipálmente iha vida kooperativa mak liu-liu domina oinsá atu uza osan, buka osan, no oinsá atu rai osan”, nia esplika.

Istótikamente, kooperativa kréditu hahú estabelese iha TL iha loron 24 fulan Abril tinan 1996, maibé tanba situasaun kríze, paradu tiha durante tinan barak nia laran. Hafoin iha fali loron 14 fulan Novembru tinan 2010, sira hahú restaura hodi eziste to'o ohin loron no sei komemora nia aniversáriu iha loron 10 fulan Dezembru tinan 2020 ba dala-X.

“Ba kooperativa kréditu, rejísta hamutuk ne'e 71. Kooperativa produtivu ne'e hamutuk iha 27 maka rejístu, restantes nee iha, maibé seidauk rejístu”, informa nia.

Prezidente Kooperativa Lakon Nakukun, Mosu Naroman (Lanamona) husi munisípiu Maliana, Domingas dos Santos ne'ebé partisipa iha eventu ne'e hateten, durante semináriu, sekretária estadu koalia liu kona-ba polítika kooperativa ninian, oinsá atu bele hadi'a kooperativa nomós dezenvolve kooperativa ba nia sustentabilidade rasik.

Nia konsidera, eventu ne'e nu'udár vantajen boot ida ba kooperativa, tanba tuir valóres kooperativa hotu-hotu nian katak, hahú ho edukasaun, tenke kontrola ho edukasaun, no dezenvolve ho edukasaun.

“Tanba ne'e presizamente ba formasaun nee kontinuidade to'o hetan sustentabilidade,maibé mós presiza nafatin formasaun”, nia hakotu. (*)