“Husu Kooperativa sira atu organiza-an ona prepara karau sira ho Produtu sira seluk tan, tanba adjuntu ho nia team prepara ona atu kontaktu ita-boot sira no halo lansamentu koordena ho emprezáriu sira atu uza produtu sesta bázika ne’e”, dehan Prezidente Autoridade RAEOA,m Arsenio Bano iha Salaun Dominikana Santa Rosa, Ambeno, sábadu (09/07).

Tanba implementasaun Programa Sesta Bázika iha tinan 2022 halo diferente oituan kompara ho anterior, tenke prepara animál (karau) inklui produtu lokál sira ne’ebé mak iha rai laran.

Ba kompaña ne’ebé manán iha tenderizasaun ba distribuisaun programa ne’e tenke koordena hamutuk ho Kooperativa sira iha Oekussi laran.

“Ita sei bele ko’alia ho kompaña sira bele mós koordena ho kooperativa sira prepara produtu no sira mós bele hetan osan mós husi Sesta Bázika”, afirma nia.

Sekretáriu Estadu Kooperativa (SEKOOP), Elizário Ferreira husu ba Kooperativa sira iha Oekussi laran tomak prepara sira-nia an hodi envolve iha Programa Sesta Bázika.

“Husu ba OMM no dirijente Koperativa sira imi mós tenke envolve iha ita-nia programa Sesta Bázika ne’e, imi sira ne’ebé iha osan bele sosa komunidade ita-nia batar, no produtu sira ne’ebé iha, depois ba bolu kompaña ne’ebé manán iha tender bele mai hola imi-nia produtu sira ne’e, ha’u hanoin ne'e benefisiu di’ak ba imi”, dehan nia.

Distribuisaun Programa Sesta Bázika iha Oekussi, Sekretária Estadu Kooperativa (SEKOOP) distribui iha Sub-Rejiaun tolu mak hanesan Passabe, Oesilu no Nítibe, iha suku sanulu ho nia komunidade hamutuk 40.000 no orsamentu hamutuk kuaze miliaun $2. (*)