“Ami mós hakarak hato'o ami-nia difikuldade ne’ebé ami hasoru mak hanesan presiza materiál hodi apoiu ami mak hanesan, printer, komputadór no brangkas, kapasidade ka rekursu umanu limitadu halo transasaun ho manuál, inklui mós sede Kooperativa no seidauk formál iha Governu”, dehan nia hafoin hetan Vizita husi Sekretáriu Estadu Kooperativa (SEKOOP), Elizário Ferreira ba Kooperativa CU Fini Mor iha Rezidénsia Suku Costa, Pante Makasar, sesta (08/07).

Alende ne'e, rekomedasaun husi Kooperativa Fini Mor mak presiza apoiu treinamentu kona-ba lala’ok Kooperativa.

Sekretáriu Estadu Kooperativa (SEKOOP), Elizário Ferreira, hatan ba preokupasaun hirak ne’e, tempu badak sei apoiu formasaun ba dirijente sira kona-ba formasaun tanba ne’e preokupasaun SEKOOP nian.

“Imi-nia proposta sira ohin kona-ba kapasitasaun rekursu umanu limitadu ne’e, tama iha preokupasaun SEKOOP nian tanba ne'e programa prioridade mak edukasaun formasaun no informasaun”, afirma nia.

Tanba kuandu Kooperativa ida atu eziste tenke iha edukasaun hodi nune’e halo kontratu no dezenvolve no dependénsia totál ba Edukasaun.

Tanba iha preokupasaun seluk CU Fini Mor nian ne’ebé seidauk iha ekipamentu mak SEKOOP husu ba membru no dirijente ida sakrifika sira-nia fatin ida molok halo proposta ba printer, brankas, no komputadór.

Preokupasaun CU Fini Mor nian kona-ba sede Kooperativa, SEKOOP husu dirijente no membru tenke servisu maka'as hodi hetan membru to’o 250 hafoin halo proposta ba SEKOOP hodi husu apoiu fundu ba Sede Kooperativa nian.

“Kona-ba imi-nia sede, ha’u la promete ba ita-boot sira, ema Kooperativa ne’e ko’alia ba loos mai loos, metan dehan metan, mutin dehan mutin, ha’u labele halo uma ida ho kapasidade osan $10.000 ba membru Kooperativa ema na’in-18”, dehan nia.

Maibé husu ba dirijente no membru sira badinas hodi buka nafatin membru hodi kontinua hala’o dezenvolvimentu ba Kooperativa CU Fini Mor nian.

CU Fini Mor hari’i iha tinan 2020, to'o agora iha nia membru hamutuk 18 ho osan kapitál hamutuk  $.709.49. (*)