“Rekomendasaun husi Loriku Star seidauk la’o di’ak hodi dezenvolve di’ak liután iha futuru, primeiru presiza fó treinamentu, hodi hasa’e ami-nia kapasidade iha futuru mai, liliu kona-ba jestaun Kooperativa nia di’ak, presiza akonsellamentu no akompañamentu parte relevante, no husu apoiu manuál kooperativa karik iha, no ami presiza tebes ba asesu Estadu komparativu iha rai laran no iha rai li’ur”, dehan Dirijente Kooperativu Kréditu Uniaun Loriku Star, Lorenco Anunu hafoin hetan Vizita husi SEKOOP, Elizário Ferreira iha Suku Naimeco, Sub-rejiaun Pante Makasar, Oekussi, kinta (07/07).

Tanba ne’e husu ba SEKOOP atu apoiu materiál ba konstrusaun liliu ba sede Kooperativa ne’ebé to’o agora seidauk hari’i.

Ba estrutura kooperativa mós seidauk iha koñesimentu kona-ba lala’ok kooperativa nian durante ne’e, tanba ne’e mak presiza apoiu nafatin formasaun ba sira.

Sekretáriu Estadu Kooperativa (SEKOOP), Elizário Ferreira hatete, rekomedasaun sira ne’ebé aprezenta husi mGrupu kooperativa sira hanesan estudu komparativu sei tau ba planu asaun tinan 2023 nian.

“Kona-ba estudu komparativu ami hatama iha planu, atubele hala’o di’ak liután, tanba estudu komparativu bele sirkulu rejionál no nasionál, iha sirkulu rejionál karik imi bele aprende ho kooperativa Kréditu Uniaun Oekusse Enklave, maibé Enklave nia sistema ho banku atu hanesan”, resposta nia.

Tanba ne’e, sei bele hala’o Estudu komparativu iha sirkulu nasionál, tanba dadaun ne’e iha Kooperativa nasionál barak ne’ebé mak progressu la’o di’ak tebes.

Kréditu Uniaun CU Loriku Star ne’ebé hari’i iha tinan 2014 no dadaun ne’e iha membru hamutuk 27, ho kapitál $19.586.05 no dadaun ne’e membru barak halo empréstimu hodi halo atividade sira mak hanesan loke koes ki'ik, sosa motorizada, no selu oan sira-nia eskola. (*)