“Segunda lista ho 507 benefisiáriu ne’ebé MAPKOMS submete ne’e mós la’ós de’it jornalista, operadór Kamera no motirista, maibé inklui mós pesooál administrasaun hanesan aprovizionamentu, rekursu umanu no lojistika inklui m’os Mídia Officer Gabinete Ministru Prezidensiál Konsellu Ministru”, deklara Ministru Finansas, Rui Augusto Gomes, liuhusi komunukadu ne’ebé www.tempotimor.com asesu iha loron sesta (08/04).

Tanba ne’e, Ministériu Finansas hakarak atu informa ba Jornalista sira relasiona ho atrazu pedidu pagamentu suplementu remuneratóriu liña-frente ba Jornalista sira tinan 2021.

Haree ba Dekretu-Lei n.o 1/2022, 5 janeiru, kria Subsídiu ba Profesionál ne’ebé Dezenvolve Atividade Jornalístika ne’ebé Solisita husi Governu hodi Fornese Notísias kona-ba Vírus SARS-COV2 durante Estadu Emerjénsia.

Konforme n.o 1 artigu 2.o Diploma refere, estabelese katak ba profisionál ne’ebé dezenvolve atividade jornalístika hamutuk ho Sala Situasaun Sentru Integradu Jestaun Krize ka ida ne’ebé Governu husu hodi produz notísia durante períodu 1 Abril to’o 31 Dezembru 2021, sei atribui subsídiu pekuniáriu ba kada loron servisu efetivu benefisiáriu nian iha kondisaun direta expozisaun ba vírus SARS-Cov2, durante deklarasaun períodu Estadu Emerjénsia. Konforme n.o 2 artigu 2.o Diploma refere, Subsídiu ne’ebé refere anteriormente iha valor US$5,00 ba kada loron servisu efetivu.

Konforme n.o 3 artigu 2.o Diploma refere, subsídiu ida-ne’e bele de’it atribui wainhira iha Despacho aprovasaun lista ba profisionais ne’ebé dezenvolve atividade jornalístika husi Ministru ba Asuntus Parlamentares no Komunikasaun Sosiál, ho baze ba informasaun ne’ebé fornese husi Sala Situasaun Sentru Integradu Jestaun Krize ka husi Diresaun Nasionál ba Diseminasaun Informasaun MAPKOMS nian.

Bazeia ba Dekretu Lei n.o 1/2022, 5 janeiru ne’e, iha loron 24 marsu 2022, Ministériu ba Asuntus Parlamentar no Komunikasaun Sosiál (MAPKOMS) submete pedidu pagamentu mai Sekretariadu Tékniku Fundu Covid-19.

Tanba iha Primeira lista ne’e kompostu husi jornalista sira instituisaun mídia oioin, ho totál 288 benefisiárius, ne’ebé indika mós fatin ba halo kobertura no primeira lista ne’e hetan aprovasaun husi Ministru ba Asuntus Parlamentares no Komunikasaun Sosiál liuhusi Despacho n.o 01/MAPCOMS/I/2022.

“Maibé, tambá lista ne’e iha duplikasaun no balun konta bánkaria benefisiárius la-loos, nune’e Ministériu Finansas devolve filafali ba MAPKOMS hodi hadi’a”, esplika nia.

Nune’e mós iha loron 28 Marsu 2022, MAPCOMS submete filafali lista Jornalista sira mai Ministériu Finansas atubele prosesa, maibé iha segunda lista ne’e kompostu husi jornalista husi instituisaun mídia oioin, ho totál 507 benefisiárius ho totál orsamentu hamutuk $371.400,00.

“Maibé, segunda lista ne’e la indika fatin ba halo kobertura no laiha despaisu aprovasaun husi Ministru ba Asuntu Parlamentar no Komunikasaun Sisiál”, deklara nia.

Tambá ne’e, Sekretariadu Tékniku Fundu Covid-19 husu opiniaun jurídika ba Gabinete Apoiu Jurídiku, Ministeriu Finansas molok prosesa pagamentu suplementu remuneratóriu liña-frente ba Jornalista sira.

Bazeia ba dispozisaun legál ne’ebé iha, Gabinete Apoiu Jurídiku konklui katak, pagamentu subsídiu ba profesionál ne’ebé dezenvolve atividade jornalístika ne’ebé solisita husi Governu hodi fornese notísia kona-ba Vírus SARS-COV2 durante Estadu Emerjénsia bele de’it atribui wainhira iha Despaisu aprovasaun ba lista profísionál ne’ebé dezenvolve atividade jornalístika husi Ministru ba Asuntus Parlamentares no Komunikasaun Sosiál, ho baze ba informasaun ne’ebé fornese husi Sala Situasaun Sentru Integradu Jestaun Krize ka husi Diresaun Nasionál ba Diseminasaun Informasaun MAPCOMS nian, konforme n.o 3 artigu 2.o Dekretu-Lei n.o 1/2022, 5 janeiru.

“Tanba ne’e, atu aselera prosesu pagamentu ne’e, horisehik, Sekretariadu Fundu Covid-1, haruka ona karta ba Ministru Asuntu Parlamentar no Komunikasaun Sosiál, atu fornese despaisu aprovasaun nu’udar lista definitive, ho respeitu ba norma ne’ebé regula iha númeru 3 artigu 2, Dekretu-lei númeru 1/2022, 5 janeiru, nune’e bele fasilita prosesu pagamentu ho lalais.

Iha tinan 2020, Sekretariadu Tékniku Fundu Covid-19 mós realiza ona pagamentu suplementu remuneratóriu liña-frente ba Jornalista sira ho totál benefisiáriu 216 ho totál orsamentu $97.425,00 ba períodu fulan tolu. (*)