Observasaun www.tempotimor.com iha tereñu nota, transporte públiku marka A1, A2, B inklui Bus diresaun Dili Baukau para la tula pasajeiru.
Kundotór Bus diresaun Dili Baukau, Abrão da Costa mina kuaze folin sa'e, tanba ne'e husu Governu haree asuntu, hatun folin mina no hasa'e tarefa pasajeirus Dili Baukau.
"Ami husu rua, ne'e mak fó ona desizaun ba ami komesa halo sirkulasaun filafali, se la fó rezultadu ba ami sei para nafatin to'o elesaun mós ami para nafatin," dehan Abrão iha resintu DTT Baukau, segunda (04/04).
Tanba, antes mina folin seidauk aumenta, kada loron hetan rendimentu to'o US$70 dolár, maibé kada loron hetan de’it $30.
Maibé, kontratu kundotores ho karreta na'in kada fulan, kundotores tenke hatama (estor osan) ba karreta na'in $3.000 mak foin simu saláriu.
"Maibé agora $20 US$30 ne'e halai to'o fulan hira mak foin kundotores ho konjak (ajudante) hetan osan, kadeira 23 kalikan 23 kursi hetan $92, ami enxe mina $70 entaun $22 ami hodi setor, bainhira mak hetan $3.000 para ami simu osan," nia argumenta
Nune'e, husu Governu atu aumenta osan tarifa ba pasajeiru Dili Baukau kada ema ida selu US$5.
Alende ne’e, informasaun seluk ne'ebé www.tempotimor.com asesu husi kundotores microlete diresaun vila antiga vila nova, katak, kada transporte taka ona tarifa pasajeirus nian iha odamata, maibé pasajeiru sira bainhira tuun selu la tuir regras.
Tanba ne'e, kundotores sira, mobiliza malu hodi mai para no aprezenta kestaun mina folin no pasajeiru selu la tuir tarifa ne'ebé iha ba Diretór Diresaun Transpórte Teréstre (DTT) Munisípiu Baukau.
Hatan ba kestaun ne'e, Diretór DTT Munísipiu Baukau, Roberto da Cruz, hatete, laiha kompetesia atu hasa'e folin tarefa pasajeiru, maibé sei aprezenta ba Prezidente Autoridade Munísipiu (PAM) Baukau no ba nasionál foin deside.
"Sira delega ona naran na'in-3 ou 4 iha ona ne'e, ami sei enkontru ho autoridade Munísipiu foin bolu fali sira fó informasaun ba sira," nia hatete
Tuir planu Diretór DTT Munísipiu Baukau sei hasoru PAM Baukau iha loron 04 fulan-abril tinan-2022 (ohin) oras servisu nian hodi aprezenta preukupasaun kundotor sira-nian. (*)
