Magnifiku Reitór ISC Sebastião Pereira hatete, estudante ne’e, kompostu husi departementu enfermajen na’in-73 no parteira na’in-59.
"Ami parte Instituisaun Superior Cristal entrega estudante estájiadu sira ne'e ba Prezidente Autoridade depois entrega tutan ba Óspitál HoREX ho Sentru Saúde Tirilolo nian, hodi hala'o estájiu prátika”, dehan Sebastião, tersa (21/12).
Nia dehan, estájiadu husi departementu efermajem-73 sei hala'o pratika iha HoREX no parteira sei hala'o pratika rotasaun ba iha HoREX no sentru saúde Tirilolo Baukau.
Bainhira estudante sira tuun estájiu eskola rasik mós sei hala'o teste ba ezame kompetensia iha pre-klinika nian, tantu iha eskrita no teste laboratorium.
Prosesu hala'o ezaminasaun akompañamentu ezaminador husi Ospitál Nasionál Guido Valadares (HNGV) Asosiasaun Enfremeirus Timor-Leste, Asosiasaun Parteiras Timor-Leste inklui mós Instituisaun nasionál da saúde.
"Ezame pre-klinika ne'e la'os buat ida fasil, estudante sira tenke hatene buat sira ne'e hotu pasa mak foin hala'o estájiu pre-klinika nesesidade bazika ou ba espesializasaun, depois ida ne'e sira remata sei kontinuasaun ba Ospitál Nasionál Guido Valadares, durante fulan-3 tan ba tinan 2022 atinji hotu ida ne'e mak foin bele hakerek sira nia monografia", nia hatete
Estudante sira ne’e, hala’o estájiu durante fulan-3 iha Munisípiu Baukau. (*)