"Governu iha komitmentu hodi hala'o dezenvolvimentu ida ne'e ba Timoroan nia di’ak, tanba ne'e nia hakarak ka lakohi, tenke aselera ba oin, tanba ida ne'e di'ak ba Timoroan no di'ak ba dezenvolvimentu Munisípiu Aileu nian”, dehan nia iha serimónia kultura tidin aisuak ba rai iha Suku Fahiria, Postu Administrativu Aileu Vila, Munisípiu Aileu, segunda (20/12).
Maske família hamutuk 29 mak la konkorda iha prosesu indiminizasaun tanba desizaun la satisfasaun ho komunidade tanba aihiris komunidade nia barak liu.
"Ita-boot sira akompaña katak, levantamentu dadus ba Sidade Universidade Aileu, atu halo prosesu inidimimizasaun, ke uma-kain 29 ne'ebé mak la konkorda, maibé iha balun agora konkorda no hasoru ona señór Administradór atu koopera hamutuk hodi halo inidimimizasaun”, afirma nia.
Iha serimónia kulturál ne’ebé partisipa direta husi Ministru Ensinu Superior Siensia no Kultura (MESSK), Longuinhos dos Santos akompaña lian-Na'in husi Ohulu Raimansu no Dailor, hodi halo rituál tidin aisuak ne'ebé oho fahi no manu haree nia aten tuir kultura Aileu nian.
Hafoin haree tiha fahi no manu nia talin, Lia-Na’in Ohulu Raimansu, José da Costa hatete, rezultadu serimónia rituál tidin aisuak ba rai ba sidade universidade Aileu, fahi aten kro'at no sorin sikun, siknifika komunidade balun la konkorda hari’i sidade universidade.
"Na'an urat sira ne'ebé ami haree husi manu no fahi katak iha buat hothotu loron maibé oituan mak sikun hatudu katak lia seidauk hanesan iha balun apoiu no iha balun la apoiu, ida ne'e mak ohin haree iha na'an urat ne'ebé iha nanál ibun kroat maibé iha nia sorin ne'e sikun hela”, esplika lia-na’in iha Suku Fahiria, Postu Administrativu Aileu Vila, Munisípiu Aileu, segunda (20/12).
Serimónia rituál tidin aisuak ne'e hahú ho fahi no manu hodi haree nia aten iha ne'e, hahú iha tuku 8 to'o tuku 9 maibé kulturalmente atu tidin fatuk ain ho osan mean no osan mutin tuir Kultura Munisípiu Aileu sei hala'o iha tuku tolu madrugada to'o tuku lima madrugada.
Husi ritual ne’e atu fó bensaun ba konstrusaun no hadi’a nia fukun sira ne'ebé mak iha atu hadi’a di'ak liután iha futuru mai.
Konstrusaun ba sidade universidade Aileu ne'e sei hala'o iha Suku Fahi Postu Administrativu Aileu vila Munisípiu Aileu ne'ebé okupa rai hamutuk ektare 24.
Maibé iha Solusaun ikus ne'ebé mak deside husi lia-na’in Ohulu Raimansu hamutuk ho Lia-Na’in Dailor deside katak kontinua bele hari’i tanba ne'e lori dezenvolvimentu ba Aileu oan sira ne'ebé mak termina sira-nia estudu iha Universidade refere. (*)
