Karta ne’ebé hakerek ba Prezidente Repúblika, iha 28 novembru 2021, iha Sidade Vatikanu, Amu Papa Francisco dezeju atu iha futuru ida ne’ebé hakmatek no ksolok ba Povu Timor-Leste.

“Ba okaziaun loron Timor-Leste nian. Ha’u aprezenta ba Señor Prezidente no Povu felisitasoins cordias ho votu kresente harmonia no kooperasaun ho kbiit moris nian,  dezeja futuru ida hakmatek no ksolok ba Timoroan hotu-hotu bele hetan protesaun as  babeibeik", hatutan Xefe Kasa Sivil PR, Francisco Maria de Vasconcelos liuhui komunikadu Imprensa,  kuarta (01/12).

Santo Papa iha fulan juñu 2021 konfirma nia intensaun atu vizita Timor-Leste, hato’o liuhusi nia reprezentante Santa Sé iha Timor-Leste, Monseñor Marco Sprizzi, bainhira halo audiénsia ho Prezidente Repúblika. 

Santo Padre nia vizita mai Timor-Leste depende ba evolusaun pandemia Covid-19. Tanba ne’e, ba seguransa ema hotu ninian, Amu Papa husu ba  sidadaun ida-idak simu vasina atu hothotu protejidu bainhira Amu Papa hala’o vizita mai Timor-Leste. 

Vizita dahuluk Santo Padre nian mai Timor-Leste akontese iha 12 outubru 1989 iha tempu okupasaun Indonézia. Estadu, Igreja Katòlika no sarani tomak halo esforsu hothotu atu iha vizita husi Santo Padre Francisco mai Timor-Leste ida ne’ebé ukun rasik-an ona.

Nune'e iha tinan-2015, Governu Timor-Leste asina konkordata ho Vatikanu. (*)