Tempotimor (Baukau) - Sentru formasaun Asosiasaun Unidade Feto ba Dezenvolvimentu (AUFD) iha Munisípiu Baukau, sai hanesan ponte ba foinsa'e sira atu kompete iha kampu traballu.

"Ami hanesan sai ponte ida ba sira, ne'e mak durante ami utiliza loke área 6 iha formasaun, ami mós oferese área 2 gratuitu ba sira, signifika estudante sira hili ona programa 2 ou 3 ba leten, ami oferese área 2 gratuitu ba sira", dehan Diretóra AUFD, Bendita Amaral de Jesus ba www.tempotimor.com iha nia kna'ar fatin plánaltu, sabadu (06/11).

Nune’e, programa iha sentru formasaun hamutuk 6 ne’ebé kompostu husi Ingles, Portugues, Administrasaun, Komputadór, Jornalismu bazíku no Lideransa.

Nia dehan, bainhira formadu sira remata formasaun iha área Administrasaun Munisípiu Baukau, maibé ba jornalismu sei tuun ba estajiu iha média sira ne'ebé estabelese iha nasionál.

Sentru formasaun ne'e hahú iha tinan 2019 to'o mai tinan 2020 durante periodu rua nia laran forma ona ema nai-n-8 ne’ebé konsege hetan ona servisu no sira mós kria kampu traballu ba joven balun.

Husi faze inisíu tinan 2019 to'o tinan 2021 formadu ne'ebé tuir formasaun iha sentru formasaun AUFD hamutuk na’in 200-resin ona.

Tanba ne’e, mensajen ba foinsa'e sira iha Munisípiu Baukau lalika lakon vontade ba aprende iha kualker área, tanba aprende hanesan bukae atu bele kompete ba kampu traballu iha futuru. (*)