Membru Komisaun B liuhusi, Deputadu David Dias ‘Mandati’ hatete, problema joven barak ba estranjeiru Governu tenke foku ba rai laran prinsipalmente agrikultura hodi diminui joven sira ba Estranjiru.
“Ita hothotu hanoin barak primeiru ita-nia joven sira la’ós dehan sira mak hakarak ba porque moris iha Timor ne’e ema empregu laiha sira mós komesa boot dadaun, balun boot iha funu laran, balun inan-aman mate, balu sarjana, s2/s3 empregu laiha sira tenke moris oinsá mak tenke moris ha’u atu dehan katak uluk atu halo funu ne’e atu dehan katak aban bainrua ita ukun rasik-an ita-nia jovem sira ita hothotu sai ba liur entaun ita ukun-an halo saida”, dehan Deputadu Mandati, iha Parlamentu Nasionál, kinta (23/06).
Maibé fatór ida ne'ebé halo hodi buka ba ukun rasik-an tanba ema laiha servisu, ema seluk mai halo servisu okupa hotu fatin no Timoroan rasik asiste de’it mak Timoroan rasik deside hakarak ukun-an.
“Atu haree ba ita-nia rai ne’e ita hothotu dehan joven ne’e mak futuru ba nasaun nian maibé ita-nia enerjia produtiva mak ba hotu tiha rai liur kuandu sira ba liur ema mak tama fali mai entaun ukun rasik-an ne’e ba se?. Ne'ebé ita la bele fó sala ba malu, la bele fó sala ba ajensia sira la bele mós fó sala ba ita-nia joven sira”, afirma nia.
Tanba moris mukit la’ós tama kauza ida maibé mukit ne’e hanesan konsekuénsia ida tuir loloos Governu hothotu tenke haree tanba saida mak empregu laiha no oinsá atubele kria
“Agora ne’e ita hothotu Estadu ne’e tenke hanoin saida mak hanesan ne’e tanba empregu laiha, agora ajensia sira joven sira ba keta halo bee fó osan ba sira mais certo agora ne’e hothotu buka sorte de’it ona se mak liman lais nia hetan, se mak la lais mate fatin ne’e la’ós fenomeno ida ne'ebé ami mesak mak haree ita hothotu tenke haree”, hatete nia.
Maske joven sira sai Agrikultór maibé nunka organiza agrikultura apoiu sira hodi prepara-an nafatin halo produsaun iha rai laran hodi garante no kria kampu servisu ba futuru.
“Ema balun mai aluga tan ita-nia rai para sira halo tan agrikultura durante 50 anos komérsiu ema mak kaer ona agora kaer tan agrikultura ita atu ba para iha ne'ebé”, dehan nia. (*)
