“Asina nota entedementu ida ohin ne'e, atu instituisaun rua ne'e bele servisu hamutuk liután iha área tékniku,nomós iha área sira peskiza nia, no fahe informasaun ba malu, tanba neste momentu CO25 presiza liu informasaun tanba ami halo peskiza, e CAMSTL durante tinan barak ona rekolla dadus e ami komité Orientador presiza asesu ba informasaun sira ne'e, tanba ne'e mak nota de entedementu ida ne'e, ajuda liután ami CO25 hodi bele asesu ba informasaun, liliu istória Timor nia sira”, dehan Prezidente CO25, Constâncio Pinto ‘Terus’, iha edifísiu CO25, Bidau Akadiru Hun, tersa (05/10).
Aleinde ne'e mós, kooperasaun iha área tékniku liuliu iha formasaun, tanba CO25 mós dadaun ne’e fó formasaun ba membru sira iha CO25 ba área peskiza nia nomós área arkivu.
“Tamba CAMSTL mak iha ona esperiénsia ba ida ne'e e ami presiza tebes sira-nia apoiu, iha área hirak ne’e”, dehan nia.
Suplente Asuntu Legál no Membru Board CAMSTL, Tomas Lim O Haolain hatete, nia parte sente kontente tebes ho asina akordu ne’e, tanba ne’e nu'udar dalan ida ne'ebé di'ak, atu bele servisu hamutuk liután iha futuru.
"Agradese ba kooperasaun ne'e, tanba ida ne'e oinsá atu ita servisu hamutuk liután iha istória Timor nia, nune'e ita sei koopera malu di'ak liután iha área tékniku, arkivu, peskiza no seluk tan”, afirma nia. (*)
