“Ita tenke kontinua nafatin halo aproximasaun no halo monitorizasaun no akompañamentu ba sira atu nune’e programa naroman ba suku ne'e labele sai programa naran de'it, maibé programa ne'e tenke sai realistiku e programa ne'e tenke iha nia kontinuidade”, dehan Ministru Francisco Jerónimo,iha Gabineti MAPKomS, Palásiu Governu segunda (16/08).
Ho Programa Naroman ba suku iha área MAPKomS nia ne'e oinsá fó formasaun ba joven sira iha suku, nune'e halo naroman komunidade nia hanoin iha suku kona-ba dezenvolvimentu ne'ebé la'ó iha rai laran.
Governu hakarak lori dezenvolvimentu konsentra iha povu, tanba povu mak sai na’in ba dezenvolvimentu.
“Nune'e programa Naroman ba suku ne'e la'ós ami ba hasoru malu tiha depois husik hela maran ne'ebá, pois laiha buat ida ne’e la’e, maibé programa ne'e tenke iha nia kontinuidade tanba ita hakarak ona lori ba, ita tenke halo kontinuasaun nune'e sira bele moris sela’e ita ba tau tiha maten tiha depois ita husik hela ne'ebá, ita ba fali fatin seluk ne'e ita buka mak aumenta maibé rezultadu laiha”, afirma nia.
Nune’e Diresaun Nasionál Diseminasaun Informasaun (DNDI) ninia servisu mak halo akompanamentu, no nafatin halo avaliasaun ba programa naroman ba suku, ne'ebé dadaun ne'e lansa ona iha fatin neen.
Maibé ba buat ne'ebé seidauk di'ak hadi’a atubele sai di'ak, nune'e sira sai independente duni ho sira-nia informasaun iha baze. (*)