Diretóra UKAE, Amelia da Silva Araújo hatete, antes halo pagamentu ba estudante sira ne'e tenke tuir regra husi Ministériu ba Assuntus Kombatentes Libertasaun Nasional (MAKLN) liuhusi Komisaun Omenajen, Supervizaun ba Rejistu no Rekursu (KHSRR).
“Estudante sira ne'ebé mak atu hetan subsídiu refere mak veteranu nia oan rasik, nunee UKAE haruka karta lista kandidatu ho fixa veteranu, no sertidaun RDTL husi kandidatu subsídiu nian ba MAKLN liuhusi KHSRR”, esplika Amelia da Silva Araújo iha Salaun MESSK, Vilaverde, kuarta(07/07).
Estudante lolos hamutuk na’in-haatnolu-resin-sia (49) maibé rezultadu karta resposta husi MAKLN liuhusi KHSRR katak estudante na’in-47 mak iha direitu ba subsídiu no estudante na’in-2 la bele hetan tanba na’in-1 la’ós veteranu nia oan rasik no ida seluk sei iha prosesu verifikasaun nia laran.
Husi estudante na’in-47 mai kompleta dokumentu iha UKAE ona, maibé ida konsela tanba hetan bolsa parsial iha FDCH, na’in-3 sidauk mai kompleta dokumentu nune'e iha loron kuarta (07/07) asina kontratu lolos mak hamutuk 43.
Iha fatin hanesan, Acacio Maris nu'udar Veteranu sente kontente no agradese ba MESSK no UKAE tanba bele ajuda ona sira hodi fó subsídiu ba nia oan nia estudu.
"Kontente no agradese ba MESSK tanba liuhusi UKAE bele ajuda ona ami sira-nia terus, hodi fó oportunidade no subsídiu ba ami-nia oan sira iha sira-nia estudu”, afirma Acacio.
Nune'e Estudante, Anicetu Amaral, sente kontente no orgullu tanba bele hakman netik ona todan husi inan aman sira.
"Ha'u kontente tebes tanba MESSK liuHusi UKAE bele hakmaan netik ona todan ne'ebé ha'u-nia inan aman iha, tanba ha'u-nia inan aman mesak agrikultór de'it no labele sustenta hotu ami oan sira-nia estudu, nune'e oportunidade ba subsídiu ida ne'e ha'u agradese tebes”, dehan nia.
Entretantu subsídiu ba estudante sira ne'e diferente ba sira ne’ebé Diploma tolu (D3) hetan US$700 no ba sira lisensiatura (S1) hetan US$900 kada anual.
Estudante Bolseiru sira ne'e mai husi, Universidade Nasionál Timor Lorosae (UNTL), Universidade Orientál Timor Lorosae (UNITAL), Universidade da Paz (UNPAZ), Universidade Dili (UNDIL), Institute Of Business (IOB) no Institutu Superior Cristal (ISC). (*)
