Iha eleisaun ba reitór foun husi periodu 2021 to'o 2026 ne'e, kompete husi profesór doutór na'in tolu mak hada’u malu, maibé profesór doutór João Soares Martins mak sai vensedór ka manan na’in.

Hafoin sai vensedór ba eleisaun ne'e, reitór eleitu João Soares Martins agradese ba konfiansa ne'ebé Konsellu Jerál no univesidade fó.

"Ha'u fiar katak, la'ós ha'u mesak, maibé hamutuk ho ita-boot sira hodi lori UNTL ba oin," Reitór eleitu João Soares Martins hateten iha nia diskursu hafoin eleitu iha edifísiu Politéknika Hera, Kinta (3/12).

Nia hatutan, servisu barak ne'ebé sei mai, tanba ne'e la'ós João Martins mesak mak sai vensedór, maibé hotu-hotu sai vensedór.

Iha fatin hanesan reitór UNTL sesante Francisco Miguel Martins kongratula reitór foun ne'ebé ohin Konsellu Jerál fó ona konfiansa.

"João eleitu ba reitór tanba agora ninia tempu para serví ba instituisaun ida ne'e. UNTL ema kualidade barak tebes, tanba ne'e UNTL ne'e la depende ba ema ida de'it, tanba ne'e iha oportunidade para sira bele ezerse sira-nia funsaun hodi kontribui iha prosesu dezenvolvimentu instituisaun no nasaun ne'e," Reitór sesante ne’e hateten.

Nia mós dehan, iha mundu akadémika laiha opozisaun, maibé iha mak koopera malu, nune'e bele serví instituisaun ida ne'e ba oin.

Entretantu, profesór doutór João Soares Martins eleitu ba reitór foun ho votu 10 ne'ebé atinje pursentu 83%, alende ne'e reitór sesante UNTL Francisco Miguel Martins hetan votu rua ho pursentu 17% no profesór Acácio Cardoso Amaral nia votu zero. Nune'e, reitór eleitu sei hetan pose iha Janeiru 2021.

Kandidatu tolu ne'ebé kompete ba reitór foun iha periodu 2021 to'o 2026 mak hanesan Doutór João Soares Martins, Doutór Francisco Miguel Martins no Doutór Acácio Cardoso Amaral.(*)