Sekretáriu Jerál Konsellu Veteranu Munisípiu Baukau, Manuel da Costa Soares, haktuir, kronolojia rai hektar-2 iha Aldeia Kaidilale Suku Bukoli, ne'ebé planu atu hari'i monumentu ba saudozu Vicente Reis kodigu ‘Sahe’ nian, antes ne'e komunidade entrega ona ba Suku, konsidera sai ona ba patrimoniu Suku nian, nune'e Autoridade Suku hamutuk ho família saudozu atu konstrui monumentu, maibé komunidade uma ka'in-2 nafatin okupa, tanba sente jerasaun husi komunidade ne'ebé antes ne'e entraga rai.
"Rai ne'eba ne'e ema la iha laran, sira uma 2 ne'e de'it mak iha laran, tanba sira sente hanesan jerasaun ne'ebé sira tur iha laran, maibé rai ne'e entrega ona ba Suku, razaun ida ne'e mak família hakarak hari'i iha fatin patrimoniu Suku nian, maibé alin Orlando dehan veteranu hada’u rai", dehan nia iha vila antiga, Sesta (03/02).
Relasiona ho problema rai ne'e, Konsellu Veteranu Munisípal liuhusi Servisu Diresaun Teras Propriedade Baukau, hato'o ona ba nasionál liu-liu Ministéru Justisa (MJ) atu rezolve problema refere hodi halo'ot ona saudozu nia ruin ne'ebé durante tinan 20 ona sei rai iha uma família saudozu nian, iha Baukau Bukoli.
"Sira nia prezensa mak bele fó solusaun halo mediasaun ba buat ne'ebé akontese iha Bukoli", nia afirma
Husu MJ atu rezolve lalais problema refere, tanba alende husi kontrusaun monumentu ba Saudozu Sahe, Ministru Obras Públikas (MOP) no Ministru Turizmu Komérsiu no Indústria (MTKI) tau ona orsamentu husi Orsamentu Jerál Estadu (OJE) 2023 atu har'i mós sentru formasaun ba jovem sira ne'ebé sei hari'i iha fatin hanesan.
"Buat hotu ami prepara tiha ona, hein de'it dezisaun Governu Sentral nia sieredade, konsidera ne'e importante ga la'e, katuas Sahe ho nia ferik oan tau iha ne'eba tinan 20 ona", nia akresenta
Enkuantu orsamentu husi Konsellu Veteranu tinan 2023 husi nasionál ba Baukau iha ona, ne'ebé sei aloka ba fatin rua, mak hanesan, monumentu Saudozu Sahe no Komadante David Alex "Daitula" nian, ne'ebé sei konstrui morru inklui konstrui bee dalan (salurang).
Alende mós liuhusi Konsellu Konsultivu Munisípal tau ona orsamentu hamutuk rihun US$160, ne'ebé sei aloka ba parte indiminizasaun ba komunidade uma-2 refere no prepara BQ ba monumentu saudozu Sahe nian. (*)
