Sekretáriu Jerál Konsellu Veteranu Munisípiu Baukau, Manuel da Costa Soares, esplika, osan ne'ebé apoiu ba estudante sira iha Baukau, tanba Prezidente Konsellu Veteranus Nasionál, hato'o preukupasaun kona-bá veteranu grau 0a3 no 4a7, ne'ebé dadaun laiha kbi'it atu kontribui finansiametu ba oan nia estudu.

Nune'e parte SASCAS tau ba konsiderasaun preve rihun US$36, kompostu husi apoiu ba estudante sira, no fó formasaun ba grupu negósiu sira husi veteranu grau 0a3 no 4a7 iha Baukau.

"Tinan ne'e fó apoiu ba estudante 59 nia osan hamutuk rihun US$23.600, kada estudante ida hetan US$400, fó tulun ba sira ne'ebé presiza duni, maske ema hotu presiza, maibé balun sei iha netik, maibé balun laiha liu kedas, entaun ami identifika ne'ebé mak laiha liu kedas ne'e", nia hatete iha kna'ar fatin vila antiga Baukau, Kinta (16/02).

Enkuantu prosesu verefikasaun ba estudante hirak ne'e, kompostu grupu 2, mak hanesan Sekretáriu Zona Postu no Suku inklui Naroman Matebian ne'ebé pertense ba Konsellu Veteranus Baukau.

Prosesu verifikasaun durante fulan-3 nia laran iha Suku 59, ne'ebé halo identifikasaun ba oan veteranu grau 0a3 no 4a7 ne'ebé sei ativu eskola iha Ensiñu Báziku Primeiru-Segundu Siklu, Ensiñu Báziku Treseiru Siklu, Ensiñu Sekúndaria, no Universidade.

"Osan ne'e maske oituan, maibé bele ajuda ona sira, ami nia esperansa mak ajuda ne'e oituan, maibé uza ho didi'ak bele fó benefísiu ba ita", nia akresenta

Entretantu apoiu fundus ba estudante sira ne'e, loron 13 fulan-fevereiru tinan 2023, iha salaun Instituisaun Apoiu Dezenvolvimentu Emprezarial (IADE) Baukau, ne'ebé entrega Direita husi Ministru Asuntu Kombatentes Libertasaun Nasionál, Julio Sarmento "Meta Malik". (*)