“Ha’u hakarak felisita estudante graduadu sira hotu, ne’ebé iha tinan tolu ka haat nia laran liubá, hili tiha ona kursu iha universidade ida-ne’e hodi hala’o sira-nia estudu no, hafoin ho empeñu no dedikasaun maka’as, sira konsege to’o duni formasaun nia rohan. Tanba razaun ida-ne’e mak, ha’u fó parabéns ba finalista sira tamba manán ona etapa formasaun nian. Ho ida-ne’e, sira prepara-an didi’ak ona atu kompete hodi tama iha merkadu traball”, hatete nia iha Serimónia Graduasaun Universidade Nasionál Timor-Leste (UNTL), CCD, kuarta (31/08).

Alende fó omenajen ba finalista sira tanba bele remata ona sira-nia estudu durante tinan naruk nia laran iha Universidade refere.

“Ha’u hakarak aproveita oportunidade ne’e hodi fó omenajen ba finalista sira-nia família ne’ebé mak ohin marka prezensa iha ne’e, tanba, maske durante ne’e imi helik de’it iha kotuk, maibé imi mak garante ona kondisaun materiál no afetivu ba imi-nia oan sira-nian ne’ebé ohin hetan graduasaun. Ba ida-ne’e, vitória ne’ebé ohin komemora iha fatin ne’e, sai hanesan vitória ba imi hotu nu’udar família”, afirma nia.

Serimónia graduasaun ne’e, hanesan mós vitória ida ba Timor-Leste, tanba kada joven ne’ebé mak hetan graduasaun no kompleta ninia formasaun.

“Ita-nia rai Timor mós hetan kualifikasaun rekursu umanu atubele hadi’ak ita-nia futuru, ne’ebé sei mai ho ezijénsia no dezafiu barak mak presiza tebes rekursu umanu ho kompeténsia. Bainhira ha’u partisipa iha serimónia graduasaun, ha’u sente konvensidu liutan katak, juventude nu’udar rikeza boot Timor-Leste nian. Notísia di’ak ida mak Estudu demográfiku ne’ebé ita hatene publika ona, hatudu katak ita-nia populasaun barakliu mak joven sira”, hatete nia. (*)