"Primeiru ita agradese ba Maromak, tanba depois de 507 anós prezensa fiar  Katólika nian buras iha Timor ita primeira vez hetan Kardiál Timoroan ida husi rai ki'ak ida ne'e, ita sente orgullu, katak iha mundu nia oin ita mós ema, ita mós fiar duni, tanba ne'e mak Papa haree kona-ba ita nia situasaun, ikus mai tenke fihir Kardiál ida mai husi ita nia rai," dehan Padre Manuel iha kna'ar fatin vila antiga, tersa (31/05).

Amu Papa Francisco fó sai, Arcebispu Arkidioseze Dili, Dom Virgílio do Carmo da Silva sai Kardeál dahuluk ba Uma Kreda iha Timor-Leste, tanba Maromak nia grasa ida ba rai doben Timor, no Maromak nafatin fó bensaun ba Timor nia ukun rasik aan no Maromak mós la husik Timor nia dezafius sira hotu.

Konfiansa Batikanu nian ba ulun na'in Kreda Timor nian, tanba atu kolabora ho Amu Papa Francisco hodi asegura fiar Katólika iha mundu tomak.

"Esperansa mak nia tenke lori Timor ba mundu, tanba aban bainrua nia servisu ida mak kuandu Kardiál sira halibur hamutuk nia mós tenke marka prezensa to'o tempu mak Amu Papa ida mate sira ne'e mak sei tuur hamutuk hili Amu Papa ida," nia agrumenta

Husu sarani Katólika iha Timor laran, atu nafatin agradese ba Maromak hodi komporta aan, hanesan ema sarani di'ak ho identidade kulturál ho kritanizmu rasik, maibé kontinua kria problema mak sei estraga kredibilidade nasaun nian iha mundu, tanba dadaun na'in ulun husi Timor rekoñese ona iha mundu nia matan.

"Ita suporta ita nia bibi atan sira ne'e, maske ki'ak no ki'ik, maibé Timor mós bele, tanba ita ukun rasik aan, bele tanba nu’undar Kreda ita mós hatudu ba mundu, ita iha reprezentante tur iha nível mundiál," nia informa

Tuir planu, iha loron 27 fulan-augostu tinan-2022, Arcebispu Arkidioseze Dili, Dom Virgílio do Carmo da Silva sei ba batikanu hodi tuir promesa Kardiál nian, hafoin fila mai TL, parokia sira sei halo misa agradesimentu, tanba Arcebispu Arkidioseze Dili, Dom Virgílio do Carmo da Silva nu’undar mós Kardiál dahuluk igreja Timor nian sei hala'o de'it nia kna'ar iha teritóriu nasionál. (*)