“Nu'udar difisiénsia hakarak hato'o ba kandidatu na'in-rua ne'ebé mak eleitu tenke tau Ema ho Difisiensia (EhD) hanesan ho ema normal labele tau ami iha kotuk”, dehan Reprezentante Ema ho Defisiente, Ceziano Moniz Amaral, iha AHDMTL Manleuna, foin lalais ne’e.

Hanesan Difisiénsia eziji mak Edukasaun, subsídiu ba difisiénsia sira no prepara fatin ne'ebé digno ho kondisaun di'ak atubele fasilita defisiente sira iha teritóriu tomak.

“Ha’u pesóal sente kontente tanba iha uma, ha’u labele aprende buat maibé liuhusi Asosiasaun Halibur Difisiente Matan Timor-leste (AHDMTL), ha’u bele aprende buat barak”, dehan nia,

Reprezentante Difisiente Munisípiu Manufahi, Joela de Jesus da Silva hatete, hanesan Ema ho Difisiensia (EhD) hakarak hili ema ne'ebé mak halo tratamentu di'ak tau prioridade bae ma ho defisiensia tanba hakarak iha oin la’ós iha kotuk.

Maske ho kondisaun defisiensia la’o ho ema la normal maibé iha direitu ne’ebé hanesan ho ema normál no presiza inklina ema ho defisiensia iha prosesu dezenvolvimentu rai laran.

“Hanesan defisiensia ami lakohi ema atu kasian ba ami maibé ami hakarak prezidente eleitu tau prioridade ba ami ho defisiensia no inklina ami iha dezenvolvimentu nasionál”, dehan nia,

Antes ne'e, lahatene letra A no B maibé tama iha Asosiasaun Halibur Defisiensia Matan Timor-Leste (AHDMTL) durante tinan ida sente di’ak tebes maske seidauk eskola maibé bele lee rasik uza liman raba ho sentimentu bele koñesementu letra.

“Ami aprende letra brail ne'ebé uza liman mak raba diferente ho maluk sira ne'ebé normal ne'ebé aprende letra awas ne'ebé presiza fatin di’ak maibé ami defisiensia maske rai manas pasiénsia aprende nafatin tanba ne'e mak oportunidade mai ami”, esplika nia.

Reprezentante Difisiente Munisípiu Lautein Jóse de Jesus rekomenda, Prezidente Repúblika ne'ebé eleitu tenke tau prioridade ba Ema ho Difisiensia (EhD) atubele asesu ba buat hotu labele tau defisiente iha kotuk, tanba iha direitu atu partisipa iha área saida de’it.

“Ami presiza edukasaun, infraestrutura no durante ne'e, implementa ona edukasaun inklusif maibé la’o seidauk másimu. Kandidatu Prezidente Repúblika ne'ebé eleitu tenke tau importánsia ba edukasaun atu ami bele asesu ba edukasaun ho prosperidade”, afirma nia.

Dadaun ne'e, fatin ne'ebé utiliza aprende la seguru tanba defisiente sira seidauk iha fatin atu konstrui foun, tamba ne'e, husu prezidente eleitu bele oferese fatin ne'ebé di'ak ba sira.

“Ami hodi hela no aprende tanba fatin ne'e sei aluga hela. Durante Tinan ida, ami aprende Letra Brail nomós estraordináriu hanesan Kultura, Formasaun Lingua Portugés Job no Lingua Inglés”, informa nia.

Iha mós mensajen ba EhD ne'ebé namkari iha Timor laran tomak ne'ebé sei faze analfabetizasaun organizasaun ida ne'e nakloke ba ema hotu atubele aprende hamutuk iha fatin refere hodi bele kóre bareira diskriminasaun nian ba defisiente hotu. (*)