“Ha’u hakarak husu uluk ba povu, sarani katóliku hotu, atu iha tempu kampaña labele husik tempu semana santa liu de’it”, dehan Dom Virgílio hafoin partisipa seremónia inaugurasaun gruta Universidade Dili (UNDIL), iha Mascarihas, sábadu (02/04).
Tanba, eventu ba semana santa, ninia sakralidade sei hala'o dala ida iha tinan ida nia laran, ne'ebé marka ona iha loron sesta ho sábadu, no iha momentu ida ne'e ema hotu tenke nonok hodi hanoin kona-ba maromak nia mate.
“Kuandu tempu ne’e mak ema halo kampaña ka barullu bele dehan momentu lulik ne’e lakon duni. Loron seluk mak iha sábadu santu, atu hanoin kona-ba Jesus nia moris hias (resureisaun)”, esplika nia.
Maske atividade kampaña nu’udar liberdade ba ema hotu, maibé nu’udar sarani no kristaun ida atu la husik momentu grasa Na’i Maromak la’o liu le’et de’it husi sira.
Ho ida ne'e, husu nafatin ba militante no simpatizante partidu sira hotu ne’ebé fó apoiu ba kandidatu na’in-rua ne’e mesak sarani katólika oan de’it, bainhira partisipa iha kampaña hodi ezerse liberdade, labele haluha identidade nu’udar sarani loloos, tanba ne’e momentu ida grasa nian.
Iha ne’e husu mós ba kandidatu na’in-rua atu tau-an iha tempu kampaña ne’e ho hakmatek hodi labele influénsia povu ki'ik sira ba hanoin ne’ebé ladi’ak, maibé buka atu lori sarani sira ho hanoin nafatin loron importante semana santa nian iha sira-nia moris.
Tanba, kondisaun kampaña iha semana santa bele prejudika kosentrasaun sarani sira, no antes ne’e Konferénsia Episkopál Timorense halo duni karta ida hodi dirije ba Prezidente Repúblika, Governu, Tribunál Rekursu, no Komisaun Nasionál ba Eleisaun sira (CNE) atu husu konsiderasaun hodi tetu tempu kampaña iha semana santa ne’e. (*)
