“Prontu hau hakarak atu hato'o, iha ema na’in-10 ne'ebé mak ekipa ba haree entre sira ida duni mak joven Leonito, nia iha área ba ekonómia ninian ne'e tanba mesmu nia ho kondisaun fiziku hanesan ne'e maibé nia kontinua hala'o iha tempu pandemia. Entaun ami labele realiza duni programa ida ne'e nomós ho programa seluk gabinete nian, tanba momentu ne'e tama ona iha pandemia Covid, depois labele mobiliza ona ema liu na'in-10”, dehan nia ba www.tempotimor.com iha Salaun Luz Clarita, Akait, foin lalais.

Ba lamentasaun no sujestaun ne'ebé mak hato'o husi Defisiente Matan, mak espoza Prezidente repúblika hakarak klarifika katak ida ne'e programa gabinete nian hamutuk parseiru sira, hanoin hela atu fó rekoiñesimentu ba pesoál eminente ka ema ne'ebé hala'o atividade di'ak durante pandemia.

Maibé iha tinan 2021, gabinete Espoza PR haree liubá sira ne'ebé hala'o atividade mesmu iha pandemia covid-19 nian laran, ida ne'e mak ekipa identifika atu fó prémiu.

Tanba ne'e, iha ema na’in-10 ne'ebe ekipa identifika ona, maibé programa ne'e labele realiza entaun adia fali ba tempu seluk.

Iha tinan 2020, Gabinete espoza Prezidente Repúblika fó ona rekoiñesimentu ba pesoál eminente sira, no iha tinan 2021 ne'e atu haree ba parte seguransa ninian liliu sira iha fronteira, iha área saúde ninian, ne'ebe tau matan ba Covid, no pasiénte, líder komunitáriu balun, profesór, nomós ba sidadaun sira ne'ebé mak haree katak sira hala'o hela sira-nia atividade.

"Ho ida ne'e ha’u bele hato'o katak ami la realiza duni la’ós dehan promesa falsu, maibé ida ne'e programa gabinete nian, ami hamutuk ho parseiru sira, labele realiza duni tanba de'it Covid-19”, esklarese nia.

Tanba ne'e, lori gabinete nia naran, husu deskulpa, ba Defisiente Matan nomós ba sira ne'ebé seidauk hola parte iha programa ida ne'e, tempu oin sei realiza, maibé seidauk bele promete.

Diretór Ezekutivu Yayasan Hak, Xisto dos Santos, hato'o apresiasaun boot ba inisiativa no esforsu husi Gabinete Espoza PR nian ne'ebé mak atu entrega prémiu no rekoiñesimentu ba sira.

Ba kestaun prémiu ne'e, presiza hetan reforsa husi Sekretáriu Estadu ba Igualidade no Inkluzaun (SEII) atubele kontinua ba futuru.

“Ba dahuluk ami apresia inisiativa husi ita-nia espoza Prezidente Republika ne'ebé mak iha planu di’ak, pelumenus atu rekoiñese no valoriza ita-nia maluk defisiénsia sira”, hatete nia ba www.tempotimor.com iha nia kna’ar fatin, Farol, tersa (29/03).

Ba inisiativa ne'e, HAK husu atu labele mai husi husi espoza PR de’it, maibé SEII mós hola parte, oinsá atu materializa, atu konkretiza, esforsu ho inisiativa ne'ebé mak mai husi espoza PR.

“Ne'e esforsu ida ne'ebé ita atu dignifika ita-nia maluk balun ne'ebé durante ne'e ema ladun hateke hetan”, hatete nia. (*)