“Tempu ne'eba ha'u hirus tanba sira promete tiha premiu ida mai ha'u iha 2021, dehan katak atu halo selebrasaun loron mundiál feto nian ne'e dehan ha'u mós tenke ba partisipa iha ne'eba atu hetan prémiu, tanba sira haree ba ha'u-nia lala'ok la'o ne'e di'ak, entaun ha'u mak hetan númeru 1, Entaun promete tiha premiu ida mai ha'u to'o ohin loron buat sira ne'e la realiza”, dehan Defisiénsia Matan Leonito bainhira dada lia ho www.tempotimor.com iha Estrada públiku, diresaun Kuluhun ba Bidau, sábadu (26/2).
Iha momentu ne'eba, Gabinete husi espoza Prezidente Repúblika nian haruka funsionáriu ba buka duni defisiénsia sira iha asrama East Timor Blind Union, dehan katak atu partisipa iha selebrasaun loron feto internasionál ka ‘International Women’s Day’, atubele hetan premiu.
Ho promesa ida ne'e, konsege ba hasoru Gabinete Espoza Prezidente Repúblika nian, maibé husi funsionáriu hatan prémiu ne'e kansela ba ema na'in-10 la hetan hotu.
“Ne'e mak ha'u dehan fali ba sira katak entaun imi promete tiha mai ha'u ona, bele realiza filafali iha loron 3 dezembru 2021 hanesan loron mundiál ba defisiénsia nian ka la'e, entaun sira hatan, ah ne'e mak ami telefone ita, e to'o agora kontaktu ida laiha”, afirma nia.
Ba promesa ne'e, nu’udar defisiénsia matan, lakohi atu fó hanoin ba ukun na'in sira, liliu kandidatu sira ne'ebé hakarak kaer pasta Prezidente Repúblika periode 2022-2027, tanba iha povu barak atubele fó hanoin.
“Se hakarak kandidatu aan ba sai boot ne'e, povu barak mak fó hanoin ba imi, mais ha’u deskulpa, ha’u sei la fó hanoin”, dekalra nia.
Maibé nu’udar sidadaun ida, sei ba ezerse direitu iha sentru votasaun loron 19 marsu 2022, hodi fó apoiu ba kandidatura Prezidente Repúblika ne’ebé sei eleitu. (*)