Administadór Munisípiu Covalima Afonso Nogueira Nahak katak, estudante universitáriu no sidadaun sira ne’ebé atu ba Dili bele rejistu naran iha Seskuadra Polísia Nasional Timor-Leste (PNTL) Covalima, nune’e transporte husi nasionál bele mai foti.

"Ba estudante sira ne'ebé mak eskola iha Dili, komesa ohin bele ba rejistu naran iha Eskuadra PNTL Covalima, tanba estudante hirak ne'e mai Covalima molok lockdown. Tanba ne'e sira ba rejistu naran depois totál estudante hira no eskola iha ne'ebe, depois ami halo komunikasaun ba nasionál no enkamina ba Sala Situasaun iha nivel nasionál hodi kumpri karantina 14 dias," dehan Administradór Afonso ba www.tempotimor.com, Kinta (4/3).

Iha sorin seluk Komandante PNTL Covalima Superintendente Antônio Maria de Sá hateten, sidadaun sira ne’ebé mai munisipiu Covalima molok estadu emerjénsia hodi hala’o sira-nia misaun iha Covalima nomós estudante sira bele ba rejistu edifísio PNTL Covalima.

"Sosiedade sivíl hanesan ajensia internasionál no nasionál sira inklui estudante universitáriu sira ne'ebé mai munisipiu Covalima molok lockdown mai iha ne'e ona, komesa ohin bele mai rejistu naran. Depois mak naran hirak ne'e ami transfer ba nasionál, husi ekuipa sentru nasionál mai ho kareta hodi foti sira," katak Antônio.

Entretantu observasaun www.tempotimor.com iha terenu nota katak, estudante lubuk ida komesa horseik no ohin husu ona informasaun iha eskuadra PNTL no ba administrasaun munisípiu hodi husu imformasaun, tanba ne'e autoridade SIJK munisípiu Covalima, realiza ona enkontru no deside hodi autoriza estudante universitáriu no entidade seluk ne’ebé antes ne’e ba hal’o servisu iha Covalima.(*)