Tuir diretór Prizaun Suai, Julio Dias Ximenes katak, eis prisioneiru na’in rua ne'e hetan ona liberdade iha fulan Fevereiru nia laran, maibé kontinua hela iha prizaun laran tanba governu aplika hela Serka Sanitária.
"Prizoneiru na’in rua ne'e husi munisípiu Ainaro hotu. Prizoneiru na’in rua ne’e, na’in ida livre iha 23 fevereiru 2021 no ida seluk livre iha 26 fevereiru, maibe sira seidauk ba uma, tanba lockdown totál iha Covalima, ne'ebé ágora dadaun sira iha ne'e hela, maibé sira na’in rua hela iha prizaun ne'e la’ós kondenadu ona, tanba liga ho serka sanitária mak hela temporáriu iha ne’e," dehan diretór ne’e ba www.tempotimor.com iha nia kna'ar fatin. Horseik, (3/3).
Liga ba situasaun ne'e, Nia parte halo ona konsultasaun ho autoridade munisípiu Covalima para oinsa atu re-integra sidadaun na’in rua ne’e ba sosiedade no familia, tanba sira livre ona husi titulu kondenadu.
Hatan ba kestaun ne’e, Adjuntu Komandante Sentru Integradu Jestaun Krize, Tanenti Jon da Costa Steves katak, sidadaun na’in rua ne’ebé livre ona husi kondenasaun ne’e, bainhira serka sanitária remata ona, maibé provizóriu bele hela iha prizaun Suai, maibé estatutu la’ós ona hanesan ema kondenadu
"Sira na’in rua hela iha prizaun lai, tamba ita sei lockdown hela, ne'ebé hodi informasaun husi nivel nasionál dehan serka sanitária remata mak bele entrega ba sidadun na’in rua nia familia no sosiedade," Nia hateten.
Entertantu, observasaun www.tempotimor.com iha terrenu nota katak, ba dadaun iha prizaun suai totál dadur hamutuk 100 ne’ebé kompostu husi dadur kondenadu na’in 72 no prizaun preventiva na’in 28.(*)