Tempo Timor - Kanal Notisia, Husi imi ba imi

Switch to desktop Register Login

Tempo Timor

Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

Website URL: http://www.tempotimor.com

Rai Loos Sei Prosesa Abilio Mausoko

Published in Politika
Rai Loos. 

KAITEHU – Eis petisionariu no membru rezistensia Rai Loos promete ona sei prosesa eis polisia Abilio Mausoko ba prosesu legal, tanba konsidera halo alegasaun falsu foin lalais. 

Rai Loos hatutan, nia sente ofendididu tebes ho alegasaun falsu Abilio Mausoko nian iha komisiu ka atividade kampaña partidu FRETILIN nian iha kampu futebol Likisa katak, antes ne’e porta voz Aliansa Mudansa ba Progresu (AMP) atual prezidente Partidu Libertasaun Popular (PLP), Taur Matan Ruak (TMR) hasoru malu ho Rai Loos hodi tiru Abilio Mau Soko no José Manuel Nakfilak. 

“Jeneral ida mai enkontru ho ha’u atu tiru Abilio Mau Soko ho José Manuel Nakfilak ne’e imposivel tebes, tanba ne’e ha’u sei hato’o prosesu legal ida ba alegasaun ne’e,” hatete Rai Loos liu hosi nia diskursu iha mini kampaña AMP nian Suku Mota Ulun, aldeia Mota Ikus, Likisa, Sabádu (28/04).

Nia hatutan, akuzasaun hosi parte sira seluk Rai Loos la dun hakfodak, no maske laran kanek, maibé sempre hatudu nia oin hamnasa.

"Ida ne’e kazu seriu, tanba ne’e mak ha’u aprezenta ona ba parte juridisaun hodi lori kazu ne’e ba Tribunal tanba nia halo insultu hasoru ha’u," hatete Rai Loos. 

Nia hatutan, la sente perseguisaun no konsidera akuzasaun sira ne’e la dun hakanek nia fuan. Nune’e, nia la rai odiu no vingansa ba ema ruma.

“Ho insultu sira ne’e mak motiva ita halo serbisu di’ak liutan hodi hadia saida mak ita halo la di’ak ida iha tempu pasadu,” esplika Rai Loos.

Entretantu, antes ne’e Abilio Mausoko deklara iha kampaña partidu FRETILIN nian iha loron 23 Abril liubá iha kampu futebol Likisa katak, antes ne’e TMR hasoru malu ho Rai Loos hodi tiru Abilio Mau Soko no José Manuel Nakfilak, maibé Rai Loos konsidera deklarasaun politika ne’e nu’udar insultu ida no nia aprezenta ona ba ministériu públiku hodi prosesa ba Tribunal.

Entretantu, prezidente AMP husu ba Likisa oan sira katak bainhira partidu ruma liu hosi kareta, labele tuda no halo problema sira seluk.

“Tanba AMP ne’e naran morin iha mundu no naran boot iha ONU,” hatete Xanana. (Oki) 

 

  

  

Comment

Militante Partidu Balun Sunu Mutuk Bandeira AMP

Published in Politika
Militante hosi partidu balun sunu mutuk bandeira AMP iha suku Santa Cruz - Dili, Sabádu (28/04). Foto Tempo Timor/Raimundos Oki  

SANTA CRUZ – Militante hosi partidu politika balun sunu mutuk tiha bandeira Alliansa Maioria ba Progresu (AMP) ho intensaun atu provoka situasaun iha suku Santa Cruz, munisipiu Dili.

Bazeia ba informasaun ne’ebé Tempo Timor rekoella iha fatin akontesementu ne’e katak, antes militante AMP suku Santa Cruz monta bandeira iha área ne’eba, militante hosi partidu balun hasai liafuan katak partidu AMP mak tama iha suku ne’e “blokir tiha de’it”.

“Ami rasik mak dada bandeira AMP iha ne’e, no antes ne’e labarik balun hela sa’e ba leten besik rate Santa Cruz hatete AMP mak tama iha ne’e ita blokir tiha de’it,” hatete Elizario da Silva nu’udar responsavel poster ka panfletu AMP nian iha munisipiu Dili ba Tempo Timor iha Santa Cruz, Dili, Sabádu (28/04).

 Nia hatutan, bandeira AMP nian foin mak monta loron rua iha Santa Cruz, maibé komesa hetan sunu ona iha Sabádu madrugada, besik loos dalan atu tama ba Kinta Boot.

Hafoin ida ne’e ekipa polisia hosi postu Vera Cruz mós to’o kedas fatin akontesementu hodi halo ezaminasaun ba akontesementu ne’e nu’udar aktu krime eleitoral.

Iha loron hirak liuba mós mosu no akontese asaun krime kontra konseleiru maximu AMP, José Naimori Bucar iha munisipiu Baukau.

Entretantu, liu hosi diskursu prezidente AMP, Kay Rala Xanana Gusmão iha kampu Don Bosco Comoro, Sesta (27/04) husu ba joven sira atu kontinua mantein paz no estabilidade iha rai laran hodi labele provoka malu. (Oki) 

Comment

Durante Tinan 15 Lahetan Rekoñesementu

Published in Politika
Olegário F. Xavier 

DILI – Prosesu luta ba libertasaun nasionál mai hosi frente oioin hanesan frente armada, frente diasporta (diplomasia) no frente klandestina, maibé entre frente hirak ne’e nia hun no abut mak frente armada nian, tanba frente rua seluk tenke rona no hala’o orientasaun hosi frente armada.  

Kona – ba frente klandestina no diaspora, iha mós ema lubuk ida hosi munisipiu Lautem ne’ebé iha tempu ne’eba desidi atu kontinua luta ida ne’e ba rai liur. Hanesan iha tinan 1996 Olegário F. Xavier hamutuk ho nia maluk nain 7 seluk hosi munisipiu Lautem hetan orden hosi frente armada nian hanesan komandante Aluk, Mau Nana no seluk tan, haruka sira tenke ba rai liur hodi organiza luta ba libertasaun nasionál. Ema hirak ne’e hosi Lautem mai toba kalan ida iha Bekora, Dili. Depois iha tempu madrugada, sira sa’e subar de’it ro’o Kelimutu iha portu Dili. Hosi Portu Dili ba diresaun Kupang, sira hare Tentara Nasional Indonesia (TNI) ka’er joven ida, tiru mate tiha no so’e tama ba tasi laran. 

Hosi Kupang ba tun fali iha portu Jakarta Timur simu hosi Naldo Rei no lori ba nia hela fatin. Sira hela iha Naldo Rei nia uma durante loron tolu (3), antes sira aluga kareta mikroleta ida hodi ba hare situasaun iha embaixada Alemaña (German) atu oinsá bele halai tama ho intensaun atu husu asilo politiku (suaka politik), dahuluk sira kontaktu ona ho jornalista estranjeiru sira atu oinsá bele halo kobertura ba sira nia asaun ne’e. 

Nia hatutan, tama ba loron ha’at sira komesa ona hakat ba areador embaixada nian hodi halai tama. 

“Ami hotu halai tama ba laran, no hare seguransa ne’e la’ós seguransa sivil, maibé Kopasus ida. Kopasus ne’e mós telefone ba nia maluk sira seluk no mai ka’er ami iha embaixada laran,” hatete Olegário ba Tempo Timor iha Dili foin lalais.  

Olegario hatutan, tanba sira nain tolu seluk sente tauk demais, entaun sira haksoit sai uluk ona hodi halai hikas ba Naldo Rei nia hela fatin. Falta nain 5 mak sei aguenta iha laran, maibé bainhira militar Indonézia sira seluk to’o, no ka’er sira, sira komesa baku malu no tenta atu hadau kilat, maibé la konsege. Hosi ne’e, komesa lori sira ba sulan fali iha prijaun ida iha ai – laran tuan. 

“Iha prijaun ne’e, Prabowo Subyanto ho Jacky Anwar mak inkeritu ba ami. Derepente Luciano da Conceição “Timor Maubere” menyamar telefone direitamente ba Prabowo nia número katak ne’e hosi embaixada Inglatera no husu atu liberta lalais ema sira ne’e, tanba Uniaun Europeia oras ne’e buka hela sira,” haktuir Olegario. 

Nia hatutan, liu tiha ida ne’e, Cruz Vermelha Internasional mós uja helikopteru semo haleu prijaun ne’e hodi buka sira, maibé la hetan. Nune’e, mosu fali staff Cruz Vermella Internasional ida hosi Switzerlandia naran Ana Sofia ho kareta ba prijaun ne’e mak foin liberta sira. 

“Depois nia trata kedas ami nia pasaporte no atu semo ona rai liur mak sira nain tolu seluk foin mosu mai tan atu tuir hotu. Komesa halo tan sira nia pasaporte, no ami sai hosi aeroportu internasional Soekarno Hatta”.

Nia hatutan, hosi Jakarta ba Inglatera no para iha Lisboa, Portugal. To’o iha Lisboa simu hosi solidariedade internasional no hetan seguransa maximu hosi Guarda Nacionál Repúblicana, GNR (Polisia Portugal), no ba kedas hospital militar Portugues nian hodi halo tratamentu saúde ba kanek ne’ebé mak sira hetan durante konfrontu fiziku ho militar Indonézia iha areador embaixada Alemaña nian.

Enderesu ne’ebé sira hela iha Portugal mak iha Av. João Crisóstomo 35, 1050-053 Lisboa, Portugal. Durante iha Lisboa antede kursu ida ne’ebé loke hosi José Ramos Horta iha tempu ne’eba.

Nia hatutan, hafoin Timor – Leste ukun rasik a’an, nia desidi fila mai Timor iha tinan 2003, no aproveita konkore ba Polisia Nasionál Timor – Leste (PNTL) konsege liu no serbisu iha Profost durante tinan 15, fulan 6 nu’udar polisia Task Force no oras ne’e nu’udar Polisia Maritima ho deviza Ajente Xefe.

“Ha’u nia espresaun ne’e nu’udar ema individual ne’ebé uluk mós kontribui ba ita nia prosesu luta ba libertasaun nasionál, maibé infelizmente durante tinan 15 ona nunka hetan buat ida,” hatete Olegário. 

Maske nune’e, nia espera katak buat hotu bele la’o ho di’ak iha rai laran relasiona ho situasaun politika ne’ebé oras ne’e la’o hela. (Oki) 

Comment

@2018 - Tempo Timor. Developed by Kalohan.net

Top Desktop version