Tempo Timor - Kanal Notisia, Husi imi ba imi

Switch to desktop Register Login

Ró ne'ebé tula hela kombustivel ba sentrál eletrika Hera, maibé seidauk bele deskarga (hatun), tanba governu obriga kompañia tenke selu taxa lai mak hatun, maibé kompañia mós dehan osan laiha ona hodi selu taxa, tanba governu mak deve hela kompañia nia osan. 

DILI – Timor – Leste (TL) oras ne’e ameasadu atu “sai nakukun (black out) total” iha teritóriu nasionál, tanba problema governu seidauk selu empreza ne’ebé fornese kombustivel ba estasaun eletrisidade Hera no Betano.

Nu’udar anunsia ona hosi governu katak eletrisidade sei mate iha loron 21/07/2018 maibe parte governu halo esforsu hamutuk ho kompañia fornesedor kombustivel ba sentral elétrika Hera atu garante ahi labele mate. Iha semana kotuk governu husu ba kompañia atu hatama lalais kombustivel mai iha TL iha loron Sabado, 18 Agostu 2018.

Kompañia Esperansa Timoroan (ETO) kumpri pedidu governu nian hodi konsege lori kombustivel ho ró ida naran Angell 33 to’o ona iha portu Hera iha loron Sabado, 18 Agostu 2018 horas tuku 10.00 dadersan.

Governu TL deve kompañia ETO ho montante Millaun tolu nulu resin tolu pontu ualu Dollar Amerikanu, nune’e iha momentu ne’e kompañia laiha osan atu selu taxa ba governu, maibé mina ne’e atu hatun hosi ró. Governu liliu Ministéiru Finansa obriga kompañia tenke selu uluk taxa ho osan kuaje besik USD 490,000.

 Ró ne'ebé tula hela kombustivel ba sentrál eletrika Hera, maibé seidauk bele deskarga (hatun), tanba governu obriga kompañia tenke selu taxa lai mak hatun, maibé kompañia mós dehan osan laiha ona hodi selu taxa, tanba governu mak deve hela kompañia nia osan.  

“Ró ida tula kombustivel ne’e atraka tiha ona iha portu Hera desde Sabadu, maibé to’o agora seidauk bele deskarga ka hatun mina ne’e hodi hatama ba sentru eletrika Hera nian, tanba governu dehan tenke selu taxa lai mak bele hatun, maibé kompañia mós osan laiha ona hodi selu taxa, tanba goveru deve hotu tiha ona kompañia,” esplika traballador ETO nian ida ba Tempo Timor foin lalais. 

Traballador ne’e hatutan, se governu atual mak la solusiona kestaun ne’e mak iha posibilidade ahi sei mate hotu iha rai laran, tanba mina mak laiha duni ona. 
Entretantu, antes ne’e mós diretor produsaun eletrsidade Timor – Leste, Inácio de Jesus Leite katak iha empreza rua mak durante ne’e fornese kombustivel ba sentral eletrika Hera no Betano (Manufahi). Empreza rua ne’e mak SACOM ho ETO. Governu deve hela empreza ETO nian hamutuk millaun US $ 33, no deve mós SACOM nian hamutuk millaun US $ 6.

Iha 27 Abril 2017, Komisaun Nasional ba Aprovizionamentu (CNA) anúnsiu nia intensaun atu ajudika kontratu ho montante liu tokon $90 atu fornese kombustivel ba sentru elétriku Hera no Betano, ba tinan rua oin mai nian. Iha pasadu, kontratu sira hanesan ne’e fó de’it ba durasaun tinan ida, tanba possivel atu iha governu foun, entaun kontratu ba tinan rua ne’e asegura benefísiu ba fornesedór atuál sira. (Oki) 

Comment

Published in Politika
Written by
Read more...
Karta adiamentu tomada posse 

DILI – Governu konstitusional daualu ne’ebé lidera hosi Primeiru – Ministru, Taur Matan Ruak hasai ona desijaun final hodi adia tomada posse datolu ba membru governu nain tolu ne’ebé antes ne’e Prezidente Repúblika (PR), Francisco Guterres Lu – Olo desidi no nomeia.

Tuir karta ofisial hosi gabinete Primeiru – Ministru (PM) nian ho data 15 Agostu 2018 ne’ebé hato’o ba PR katak governu desidi adia tanba seidauk halo ajenda ba prosesu tomada posse membru governu nain tolu hanesan Alfredo Pires, Samuel Marcal no Rogério Araújo Mendonça, maibé karta ofisial ne’e mosu fallansu ida, tanba hakerek fali Manuel Marçal.

Karta ofisial ne’e mós katak pedidu ne’e nu’udar justifikasaun solidade ba membru governu nain sia sira seluk ne’ebé to’o oras ne’e seidauk simu posse.

Entretantu, partidu Aliansa Mudansa ba Progresu (AMP) haruka karta ofisial ida ba gabinete Primeiru – Ministru iha parte dadersan ho konteudu rejeita total desijaun no nomeasaun Prezidente Repúblika (PR), Francisco Guterres Lu – Olo nian atu fó tomada posse ba membru governu nain tolu. Hafoin ida ne’e, iha parte lorokraik, gabinete Primeiru – Ministru mós hasai kedas karta ofisial ida katak adia tomada posse ba membru governu nain tolu ne’e.

Antes ne’e PR Lu – Olo desidi ona katak sei fó posse ba membru governu nain tolu iha loron Kinta, 16 Agostu 2018 iha horas tuku 10:30 dadersan iha palásiu prezidensial Aitarak Laran (pr nomeia samuel maibé posibilidade amp rejeita).

Bazeia ba karta ofisial Prezidensia Repúblika ne’ebé hato’o ba xefe governu iha loron 13 Agostu foin lalais katak, PR Francisco Guterres prontu ona atu fó tomada posse ba membru governu nain tolu hanesan Alfredo Pires ba Ministru Petróleu no Rekursu Mineral (MPRM), Samuel Marçal ba Ministru Planeamentu no Investimentu Estratejiku (MPIE), no Rogério Araújo Mendonça ba Sekretariu Estadu Peskas. (Oki)

Comment

Published in Politika
Written by
Read more...

DILI – Partidu Aliansa Mudansa ba Progresu (AMP) haruka ona karta ofisial ida ba gabinete Primeiru – Ministru ho konteudu rejeita total desijaun no nomeasaun Prezidente Repúblika (PR), Francisco Guterres Lu – Olo nian atu fó tomada posse ba membru governu nain tolu.

Bazeia ba karta ofisial AMP nian ne’ebé Tempo Timor asesu katak, AMP bele aseita nomeasaun PR Lu – Olo nian bainhira fó tomada posse hotu ba membru governu nain sia ne’ebé oras ne’e sei pendente hela. Karta ofisial AMP nian haruka ona ba gabinete Primeiru – Ministru iha loron Kuarta 15 Agostu 2018.

“Membru governu nain 3 ne’ebé hetan ona nomeasaun hosi PR, AMP desidi sira sei la ba tomada posse se bainhira seidauk iha desijaun ida kona – ba sira nain 9 seluk,” konteudu karta ofisial AMP nian ne’ebé Tempo Timor asesu, Kuarta 15 Agostu 2018.

“AMP foti ona desijaun katak sei la troka nia membru nain 9 ne’e tanba laiha rajaun legal, no politika ne’ebe fundamental atu troka sira”.

Entretantu, antes ne’e PR Lu – Olo desidi ona katak sei fó posse ba membru governu nain tolu iha loron Kinta, 16 Agostu 2018 iha horas tuku 10:30 dadersan iha palásiu prezidensial Aitarak Laran.

Bazeia ba karta ofisial Prezidensia Repúblika ne’ebé hato’o ba xefe governu iha loron 13 Agostu foin lalais katak, PR Francisco Guterres prontu ona atu fó tomada posse ba membru governu nain tolu hanesan Alfredo Pires ba Ministru Petróleu no Rekursu Mineral (MPRM), Samuel Marçal ba Ministru Planeamentu no Investimentu Estratejiku (MPIE), no Rogério Araújo Mendonça ba Sekretariu Estadu Peskas.

No âmbito das competências específicas que me são atribuídas, na qualidade de Presidente da República, para nomear, empossar e exonerar os membro do Governo, sob proposta do Primeiro – Ministro, nos termo da alinea h) do artigo 860 e do número 2 do artigo 106 da Constituição da República, informo que decidi nomear o Sr. Samuel Marcal para o cargo de Ministro de Planeamento e Investimento Estratégico,” esplika karta PR Lu – Olo ba Primeiru – Ministru Taur Matan Ruak ne’ebé Tempo Timor asesu.

Mais informo que a cerimónia da tomada de posse Sr. Samuel Marcal bem como dos outros dois membros do Governo, já nomeados por mim, respectivamente, o Sr Alfredo Pires para o cargo de Ministro Petróleo e Recurso Minerais e o Sr. Rogério Araújo Mendonça para o cargo de Secretário de Estado das Pescas, tera lugar no Palácio Presidente Nicolau Lobato, no dia 16 de Agosto, às 10H30,” esplika karta PR Lu – Olo.

Maske nune’e, AMP haruka ona karta ofisial ida katak bandu total ema nain tolu ne’e atu simu tomada posse iha loron Kinta 16 Agostu 2018.

Entretantu, Alfredo Pires hatete tanba nia nu’udar partidu AMP nia ema, entaun nia tuir de’it liña orientasaun partidu nian. 

“Ha’u rona de’it katak kanseladu tiha ona, no ha’u halo tuir de’it liña orientasaun partidu nian,” hatete Pires ba Tempo Timor iha Hotel Timor, Kuarta (15/08). (Oki)  

Comment

Published in Politika
Written by
Read more...

 

 Kay Rala Xanana Gusmão

DILI – Rezultadu impase politika kuaje tama ba tinan ida ona rezultadu estadu Timor – Leste la’ós tama de’it iha krize politika, maibé mós tama ona iha krize finanseiru, tanba empreza barak mak lubun biti (taka) ona.

Antes ne’e mós Servisu Rejistu no Verifikasaun Emprezarial (SERVE) deklara tantu kompañia nasionál no internasional mak taka ona sira nia atividade iha Timor – Leste, tanba rezulta hosi impase politika ne’e. Alem ne’e mós kompañia media sira hanesan Jornal Diario Timoroman no jornal semanal MATADALAN mós taka tiha ona inklui kompañia sira seluk.

Ho sitasaun ne’e, prezidente partidu Aliansa Mudansa ba Progresu (AMP), Kay Rala Xanana Gusmão espera katak situasaun ne’e sei bele rezolve ho orsamentu jeral estadu 2018 nian ne’ebé oras ne’e governu hatama tiha ona ba iha Parlamentu Nasionál. 

“Tanba ida ne’e mak tau hela OJE agora iha parlamentu. Ita husu boot katak governu ba defende ho di’ak ne’e bele aprova hodi selu tiha buat sira ne’e hotu,” Xanana hatete ba Jornalista sira iha sekretariadu g7+, Dili Kuarta (15/08).

Maske situasaun politika atual difisil tebes ba governu atual, maibé eis komandante em xefe ne’e nafatin iha konfiansa katak sei iha esperansa hodi hakat liu situasaun difisil ne’e.

“Sempre iha esperansa. Se uluk ho kilat musan, ho bataliaun barak, ema barak mate, ema barak dadur, ema barak terus ita sempre iha esperansa. Iha buat ida ema dehan esperansa, buat ikus liu atu mate ne’e mak esperansa ne’e,” Xanana esplika. (Oki)

Comment

Published in Politika
Written by
Read more...
 
Kay Rala Xanana Gusmão 

DILI – Eis Prezidente Repúblika no eis Primeiru – Ministru, Kay Rala Xanana Gusmão hatete Prezidente Repúblika (PR), Francisco Guterres Lu – Olo hatudu ona frazilidade Estadu Timor – Leste relasiona ho impasse politika atual iha rai laran.

PR Lu – Olo desidi no nomeia ona membru governu nain tolu hanesan Samuel Marçal, Alfredo Pires no Rogério Araújo Mendonça atu simu tomada posse iha loron Kinta, 16 Agostu 2018 horas tuku 10:30 iha palásiu prezidente Nicolau Lobato, Aitarak laran (pr nomeia samuel maibé posibilidade amp rejeita), maibé prezidente partidu CNRT atual prezidente partidu AMP Kay Rala Xanana Gusmão ho diplomatikamente katak to’o oras nia lahatene buat ida.

“Ida ne’e ha’u lahatene. Ha’u lahatene. Ha’u agora ne’e g7+, ha’u serbisu agora, ha’u serbisu g7+ depois nani tasi hare Greater Sunrise,” Xanana hatete ba Jornalista sira iha sekretariadu g7+ Dili, Kuarta (15/08).

Pessoa eminente g7+ ne’e konsidera desijaun politika PR Lu – Olo nian iha tendensia maka’as atu lori estadu Timor – Leste ba frazilidade.

“Ne’e hatudu frazilidade iha ita nia Estadu, ha’u sei ba ko’alia ba rai sel – seluk g7+ nian dehan imi evita ida ne’e,” Xanana afirma.

Xanana hatutan, partidu CNRT ne’e la’os partidu ida, ema ida mak manda. Partidu CNRT iha estrutura iha buat sira ne’e hotu ne’ebé nia labele responde ba partidu nia politika. Ne’ebe partidu CNRT la’ós partidu ida ema mak dehan A hotu – hotu dehan A, nia dehan B hotu – hotu dehan B.  

Estrutura governu atual simu tomada posse iha loron 22 Maio 2018, no iha tempu ne’eba kedas PR Lu – Olo rejeita atu fó posse ba membru governu kuaje nain 11 ho rajaun sira iha involve iha kazu kriminal balun ne’ebé oras ne’e sei iha hela prosesu investigasaun nia laran, maibé hafoin ida ne’e parte AMP deklara ba públiku katak membru balun laiha kazu kriminal ida.

Kona – bá kestaun ne’e, Xanana dehan laiha ema ida mak la sala iha mundu ne’e.    

“Agora fó hela tempu mai ha’u para ha’u korizi aan itoan. Signifika, laiha ema ida la sala. Tanba ne’e mak hotu – hotu, St. António dehan mai ha’u hanesan ne’e o labele anggap diri sendiri tidak salah sama sekali (konsidera aan la sala buat ida). Ha’u tenke rekoñese katak ha’u mós sala. Hodi rekoñese katak sala, maka ita bele hadia, kurizi. Ne’ebé ida ne’e, ida ne’e St. António mak dehan ba ha’u o hakarak tau naran atu São Paulo atu bolu entaun o rekoñese o nia sala,” Xanana hatete.

Xanana esplika, iha politika, iha ne’e, iha ne’eba, iha buat hotu – hotu rekoñese dadauk ona, hadiak dadauk ona, hadia o nia aan, hadia o nia maluk sira seluk hodi depois São Pedro kuandu dehan, … oohh iha ona fatin, St. Antonio dehan ha’u mai lori o ba leten (lalehan).

Maske prezidente AMP ne’e dehan seidauk hatene kona – bá tomada posse ba membru governu nain tolu ne’e, maibé bazeia ba karta AMP nian ne’ebé haruka ba gabinete Primeiru – Ministru iha loron Kuarta, 15 Agostu 2018 husu ba Primeiru – Ministru Taur Matan Ruak atu informa ba Prezidente Repúblika katak; membru governu nain 3 ne’ebé hetan ona nomeasaun hosi PR, AMP desidi sira sei la ba tomada posse se bainhira seidauk iha desijaun ida kona – bá sira nain 9 seluk, no AMP foti ona desijaun katak sei la troka nia membru nain 9 ne’e tanba laiha rajaun legal, no politika ne’ebe fundamental atu troka sira. (Oki)

Comment

Published in Politika
Written by
Read more...

@2018 - Tempo Timor. Developed by Kalohan.net

Top Desktop version