Tanba professor sira mak envolve an iha arte marsias sei fó impaktu makas ba estudante sira.

"Fó hatene ba malu katak, ha’u la admite liu atividade sira ne’e, atu buras iha professor ida-idak nia moris, se karik ha’u rona no hatene, profesores balun mak inklui iha arte marsiais, ha’u rasik sei asina karta hodi esklui husi nia kna’ar nu’udar professor, tanba realidade hatudu bainhira professor ida tama iha organizasaun Arte Marsiál sei fó impkatu ladi’ak ba estudantes", dehan Xanana hafoin vizita urjente ba Ministeriu Edukasaun, vila verde, kuarta (29/11).

Profesores nia misaun atu serbi la’ós fatin buka servisu.

“Imi nia servisu ne’e atu tau imi nia matenek no professionál hodi fahe tutan ba ita nia oan sira, tanba estudante mak futuru ba nasaun”, dehan nia

Alende ne’e, Xefe Governu mós husu Ministeriu Edukasaun atu solusiona problema professor kontratadu na’in-1499, ne’ebé VIII Governu konstituisionál kontrata iha loron13 Abril 2023, no  tuir planu sei termina iha loron 31 dezembru 2023.

Iha vizita úrjenti ne’e akontese hafoin professores 16 ne’ebé lidera husi Konselleru, Agustinho Soares, Eis Diretór Nasional do Dezenvolvimentu do Parque Eskolar, iha Ministériu Edukasaun, hasoru Xefe Governu iha Palásiu Governu, hodi husu ajuda atu rezolve problema ne’ebé sira hasoru.

Rona tiha preokupasaun ne’e, Xefe Governu koordena ho professor sira hala’o vizita ba Ministériu Edukasaun hodi hato’o sira nia problema direta ba Ministra Edukasaun no Sekretáriu Estadu, infelizmente Ministra Edukasaun laiha fatin, tanba hala’o hela viajen husi Munisípiu Bobonaru mai Dili, nune’e Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos hamutuk ho  dirijentes no  asessores mak atende enkontru ne’e.

Iha enkontru ne’e, Xefe governu husu professores sira hato’o sira nia kestaun ba Sekretáriu Estadu no dirijentes, hafoin Konselleru Agustinho reprezenta professores hodi fo sai sira nia kestaun 2 mak hanesan, husu atu mantein kontratu ba professores kontratadu 1,499, tanba Ministériu Edukasaun atu hapara sira nia kontratu iha Dezembru 2023.

Daruak sira husu dekretu lei 31 maiu 2023, ko’alia kona-ba ingresu spesiál, ne’ebé hetan ona promulgasaun husi Presidente Repúblika, maibé to’o agora seidauk realiza no la inklui professores kontratadus 1,499.

Haree ba kestaun rua ne’e, Xefe Governu hatete, avaliasaun sempre halo hodi avalia métodu ensinu professores nian.

Xefe Governu Xanana mós fo korazen ba professor sira atu pasiensia no kontinua hanorin, tanba eskola harii bar-barak presiza profresores atu bele prenxe.

PM Xanana tatoli ba Ministra Edukasaun, atu labele foku liu ba Merenda Eskolar, maibé fó prioridade mós ba kuantidade no kualidade profesores. (*)