Harii no rehabilita infraestrutura unidade 40 iha munisípiu tolu hanesan, Ermera, Bobonaro, Likisa inklui Zona Espesial Autonoma Oecuse-Ambeno.
Tuir reprezentante UNDP iha Timor-Leste, Katina Argueta katak, harii no rehabilita infraestrutura komunitária unidade 40 ne'e permite komunidade sira atu hetan asesu di'ak liu ba saúde, edukasaun, merkadu, irrigasaun, bee no saneamentu.
"Konstrusaun infraestrutura komunitária importante no presija hadi'a asesu bee mos no saneamentu sira inklui infraestrutura saúde ba komunidade iha área rurais sira atu dezenvolve ekonomia iha TL", dehan Katina Argueta, hafoin asina dokumentus ba projetu infraestrutura komunitária iha salaun MAE, kolmera, kinta (12/10).
Ministru administrasaun estatal, Tomas Cabral, afirma, infraestrutura hirak ne'e krítiku iha área rural, tanba sei ajuda fornese sentru saúde maternidade ba inan sira, fó asesu merkadu ba agrikultor nia produsaun, infraestrutura bázika, bee moos saneamentu, kreximeentu ekonomiku no kriasaun empregu.
"Ami agradese tebes ba apoiu UNDP no governu japaun no husu ba Japaun atu kontinua apoiu UNDP hodi bele halo dezenvolvimentu di’ak liu tán ba infraestrutura iha área rural sira eh ita espera komunidade bele envolve direita iha projetu refere", nia afirma.
Aleinde ne,e mós embaixadór japaun iha timor-leste, Kimura Tetsuia, afirma, ho projetu ne’e bele kobre segmentu hotu iha sosiedade liuliu komunidade ne’ebé vulneral liu.
"Ami espera rezilensia komunidade sei hametin liu husi implementasaun projetu ne’ebé kobre segmentu hotu iha sosiedade inklui edukasaun, saúde, merkadu, bee moos no saneamentu", nia espera.
Entretantu husi total orsamentu millaun US$5,1 ne’e governu japaun finansia millaun US$4,8 no UNDP rihun US$300, no projetu ne'e sei implementa durante tinan haat, ne’ebé hahú husi tinan 2023 to’o 2027. (*)
