Tuir nia, tenderizasaun ne'ebé governu loke liuhusi Progrma Nasionál ba Dezenvolvimentu Suku (PNDS) ne'ebé atu halo reabilitasaun ba estrada husi postu Ossú to'o suku Nahareka sei laiha impedementu husi komunidade sira.

"Kona-ba tenderizasaun ba estrada husi postu Ossú ba suku Nahareka, ami garantia laiha impedementu, tanba ami hakarak ami-nia dalan di'ak no ami sei koordena ho sira seluk atu nune'e labele iha impedemntu," dehan xefe suku Paulino iha Palásiu Governu hafoin remata sorumutu ho Ministru Asuntu Parlamentár no Komunikasaun Sosiál (MAPKomS), Kinta (25/2).

Autoriedade lokál ne'e afirma, difikuldade ne'ebé povu Nahareka durante ne'e infrenta mak estrada no eletrisidade ne'ebé to'o agora seidauk tama, entaun bainhira serteza ona halo reabilitasaun ba estrada, mak parte lokál sei servisu hamutuk ho kompañia.

"Ami ajuda sira ke'e rai, tamba ami hakarak ami-nia dalan di'ak entaun ami servisu hamutuk ho sira," Nia dehan.

Entretantu, tenderizasaun ne'ebé governu liuhusi Ministériu Obras Públika loke ona konkursu públiku ba estrada rurál sira mak hanesan munisípiu Vikeke, postu administrativu Ossú Suku Nahareka ho nia númeru MOP/CD/RFQ/21010 ho totál orsamentu rihun $79.034, alende ne'e iha mós reabilitasaun estrada husi Suku Loihunu to'o Uaguia ho nia númeru MOP/CD/NCB/21024 ho montante orsamentu $507.705.

Alende husi Munisípiu Vikeke, governu mos halo tenderizasaun atu reabilita estrada rurál iha Dili, Postu Administrativu Metinaru, husi diresaun estrada Hera ba suku Liurai ho nia númeru MOP/CD/NCBR/21022 ho nia totál orsamentu $177.134 no diresaun estrada Hera ba Suku Liurai ho númeru MOP/CD/NCBR/21023 ho totál orsamentu $148.297.(*)