Padre ko'alia lia hirak ne'e tanba, mezmu tama.ona loron boot, maibé kontinua mosu konflitu ne'ebé afeta husi hemu tua, fuma sigaru, inklui halimar facebook ho whatsapp.
"Oinsa ita bele selebra Natal, se ita la hola parte no ativu, iha selebrasaun misa Natal nian, kalan ida ne'e ha'u konvida ita hotu-hotu, atu selebra Natal ho ativu, ho konsiénsia nakonu," dehan Padre Emanuel liuhusi nia omilia ba sarani sira bainhira prezide misa iha kalan Natal, horseik (25/12).
Bibi atan ne'e mós fó konvite ba sarani suku makadiki atu tau Jesus Kristu nu'udar sentru iha ida-idak nia moris, atu nune'e bele hametin liután sira-nia fiar no esperansa.
"Nia hakarak tama iha ita-nia fuan, maibé ita taka hela ita-nia fuan, maske ita-nia laran hein hela nia. maibé ita halo finji la rona, tanba kolegas, tanba tua ho sigaru ka tanba ita halimar facebook no whatsapp demais," dehan Nia.
Padre ne'e mós esplika liután, ko'alia kona-ba Natal ne'e la'ós atu hanoin kona-ba saida mak sarani presiza, maibé sarani sira presiza hasoru mak ida ne'ebé latan hela iha balada fatin.
Bibi atan ne'e mós husu ba ema hotu atu respeita malu no labele estraga ka hasai ema seluk nia vida. tanba nu'daru ema moris iha mundu ne'e iha diretu no dignidade hanesan.
"Tan ne'e Maromak mai atu fó korajen ba ita hotu hodi luta kontra abortus, luta kontra odiu malu, oho malu, halakon ema Nia vida, no selu-seluk tan," katak Padre Emanuel.
Nia mós preokupa, tanba ema soe bebe oan sira iha ponte okos, iha ai-laran, fatin lixu, nune'e mós kazu rama ambon, tuda malu inklui oho malu ho sasan kroat.
Padre ne'e afirma, selebrasaun loron Jesus nian bele lori sarani tomak atu proive funu no estraga malu, respeita moris ema ida-idak nian, tanba moris ne'e nu'udar doasaun gratuita husi Maromak, kee ita ema presiza kuidadu.
"Nune'e ita hotu, mai ita han no simu kbiit husi Jesus iha balada sira nian han fatin, atu bele fo kbiit ba ita-nia maluk sira seluk," tenik nia.
Entretantu, tuir observasaun www.tempotimor.com nian iha terenu nota katak, sarani sira ne'ebé barak liu partisipa iha misa ba festa Natal nian mak ferik no katuas, labarik, kaben-na'in sira, maibé joven sira ladun partisipa.(*)
