Komandante UEP, Superintendente Xefe, Orlando Gomes hatete, kazu ne’e akontese iha hodikalan maizomenus tuku 15:16 no konfrontu ne'e mosu entre joven sira tanba hemu tua lanu iha mate uma hodi rezulta vítima na’in-2 hetan kanek todan iha ulun.
“Problema ne’e mosu tanba vítima ho suspeitu sira hamutuk iha mate uma hodi halo servisu no sira hemu tua to’o lanu todan hodi diskute malu to’o baku malu hodi rezulta vítima na’in-2 hetan kanek iha ulun”, dehan Orlando Gomes, iha nia kna’ar fatin Kuartel UEP, Bairo Pite, kuarta (13/07).
Iha akontesementu ne’e membru sira hamutuk ho eskuadra Uatulari halo kedas kapturasaun ba suspeitu na’in-6 ho inisiál AC, AA, AC, LA, PM, no MB.
Iha prosesu kapturasaun ba suspeitu na’in-6 ne’e, UEP-COE lidera husi Komandante Pelotaun, Inspetór Asistente Mateus Pinto, hamutuk ho ekipa task force Vikeké nian ne’ebé destaka iha Uatulari.
“Agora suspeitu na’in-6 ne’e detein ona iha eskuadra PNTL Uatulari hafoin kontinua halo prosesu identifikasaun hodi submete ba investigasaun”, dehan nia.
Komandante Unidade Polísia Espesiól ne’e mós hatutan, daudaun ne’e membru UEP-COE ne’ebé destaka iha Munisípiu Vikeké hodi reforsa Komandu PNTL Vikeké hodi kontrola rigorozu ba joven sira ne’ebé perturba orden públiku. (*)
