Tuir informasaun ne'ebé www.tempotimor.com asesu husi Polísia Nasionál Timor Leste (PNTL) rekolla vendedór 35 mak ahi hán sira-nia sasán.

Tanba ne’e, iha loron segunda (14/02) tuku 11:00 oras timor-leste (otl) vítima insendiu sei ba hamutuk iha PNTL eskudra Dom Aleixo hodi halo re-aprezenta dadus.

Insendiu Akontese iha tuku 06:00 otl, uma ne'ebé Governu hari’i ba populasaun sira hamutuk 34 no uma adisional ida (1) hamutuk 35 ne’ebé ahi hán mutuk.

Insendiu ne'ebé akontese la'ós iha merkadu Manleuana tomak maibé iha área Estrada besik fatin parajen ba transporte liliu mikrolete 03 nia fatin.

Tuir Sasin, Leonito da Costa Ximenes haktuir, foufoun ne'e ahi lakan ki’ik maibé anin tama halo ahi lakan maka’as ne’ebé la konsege hamate.

“Ohin dader ne'e jam hira ha'u la hatene, ha'u dasa hela rai estudante sira Canossa sira mai, dehan maun maun, ‘ahi hán OB (obralan)’ ne'e mak ha'u halai tun ba haree, momentu ha'u ba haree ne'e ahi lakan sei ki'ik hela maibé derepente anin tama ne'e mak ahi lakan boot kedas ne'e”, informa nia iha Merkadu Manleuana, segunda (14/02).

Komandnte Operasionál Intervensaun Territóriu Bombeiru, Paulo Maia informa, ekipa Bombeiru to'o iha fatin akontesimentu ahi komesa hán no lakan maka'as ona.

“Iha oras 7:30 ami simu kedas kontaktu no Ekipa bombeiru sai kedas nune'e ami mai rega, ami to'o iha ne'e ahi lakan boot tebetebes”, afirma nia.

Iha akontesimentu ne'e tanba sirkuitu Eletriku ne'ebé iha fatin kloot, tanba ne’e exploza dala ida nia manas no rebenta, ahi hán husi rohan ba rohan.

“Kauza, iha duni fatin klaran ne'e iha eletriku ida mak iha ne'e, kerdizer ahi ne'e inisiu husi fatin ida ne'e kontadór eletriku ida iha ne'e kauzada Sikuitu eletriku, hán ona sasán eletriku e kontamina suar iha fatin ida, durasaun de mtempu ke mais de meia ora, ne'e sai ona bomba ida, entaun nia exploza dala ida nia manas e nia rebenta, e nia hán husi rohan ba rohan”, esplika nia. (*)