Vise-Ministru Interiór, António Armindo hatete, hela semana rua-resin atu tama ona ba eleisaun prezidensiál, maibé to'o agora, Ministériu Interiór seidauk simu resposta ruma husi Ministériu Finansas liuhusi Diresaun Jerál Jestaun Patrimóniu Estadu.

“Ministériu haruka ona karta bá Ministériu Finansas atu husu karreta besik 200, husi karreta Estadu ne'ebé mak Governu foti ona ba, tau hamutuk iha pool, para ita bele hetan asesu ba karreta sira ne'e, até agora ohin dia 11 ona ha'u seidauk rona notísia husi Ministériu Finansas liliu husi Patrimóniu Estadu karik sira bele disponível fornese karreta 200 ka la’e?. Se la'e sira tenke komunika sedu para, haree fali alterativu seluk”, dehan António, iha edifísiu Ministériu Interior, Vilaverde, sesta (11/02)

Bainhira Ministériu Finansas disponível duni karreta hirak ne'e, mak PNTL sei distribui balun ba postu Polísia sira, nune'e bele fó seguransa di'ak liután iha kampaña to'o eleisaun.

Vise-Ministru Interiór mós to’o seiduak simu pedidu husi Komisaun Naisonál ba Eleisaun (CNE) kona-ba koloka membru PNTL atu eskoltu kandidatu Prezidente Repúblika sira.

Bainhira pedidu sira haruka diretamente ba Gabinete Ministru Interiór, hafoin hasai despaixu ba Komandante Jerál PNTL atu ezekuta. (*)