"Sim horiseik PNTL destakadu iha Aeroportu ho UPF no eskuádra Dom Aleixo, kaptura suspeitu ANM iha tuku 3 lokraik, bainhira lori vítima na’in-4 atu aranka ba Inglaterra, no detein kedas iha sela detensaun Polísia Eskuádra Dom Aleixo durante oras 72 hodi aprezenta ba primeiru interrogatóriu iha Tribunál Distritál Dili, tanba bosok sidadaun na’in-4 hodi lakon osan ho montante US$1000-resin trata dokumentu ba servisu iha Inglaterra, maibé ohin dader ita liberta filafali hafoin ita halo komunikasaun ho Prokuradór sira”, informa Komandante PNTL Munisípiu Dili, Superintendente Xefe Henrique da Costa, iha Komandu Jerál PNTL, Kaikoli, kinta (27/01).

Maske suspeitu liberta ona maibé prosesu indentifikasaun sei kontinua la'o normal hodi tuir dalan legal.

"Relasiona ho evidénsia hanesan osan nomós motorizada ne’ebé mak iha eskuadra Don Aleixo no ita-nia parte investigasaun sei kontinua nia prosesu, no ida ne’e ita halo komunikasaun no orientasaun ba ita-nia Prokuradór tanba ita hatene na’in ba prosesu mak Ministériu Públiku no ita halo komunikasaun iha ne'eba”, esplika nia.

Tanba akontesementu ne’e mós kleur ona no presiza filafali keixa ruma depois mak foti informsaun husi parte vítima sira no nia prosesu ne’e sei aprezenta ba iha Ministériu Públiku.(*)